331

İşbu ikinci nakzın hükmü dahi iptida-i ilâmın nakzında medar-ı hüküm olan esbaba mebni olur ise davanın havale olunduğu Mahkeme-i Temyiz'de verilen karara imtisale mecburdur.

Altıncı Madde: Bir madde hakkında verilmiş olan ilâm ol maddenin hîn-i vukuunda düstür-ül amel olan kanuna muhalif olmadıkça nakz-ı hüküm istidası kabul olunmaz.

Yedinci Madde: Bir mahkemeye havale olunan davanın Mahkeme-i Temyiz'de tetkikiyle ilâmının nakz olunabilmesi ol mahkemeden sadır olan hükmün suret-i kat'iyede olmasına yani kabil-i istinaf olmamasına menuttur. Fakat karine üzerine ittihaz olunmuş olan bir karar ki anın neticesi müddei veyahut müddei aleyhe telafisi kabil olmayan bir zararı istilzam edeceği evvelce tahakkuk ede ol kararı veyahut davanın bir ciheti hakkında suret-i kat'iyede tertib-i hüküm olunmuş ise yalnız ol ciheti asıl hüküm lâhik olmazdan evvel Mahkeme-i Temyiz nakz edebilir.

Sekizinci Madde: Mahkeme-i Temyiz nakzı istida olunan ilâmda hükme medar olmak üzere münderiç olan ahval ve keyfiyatı muhakkak add edip tahkikine girişmez. Ancak işbu ahval ve keyfiyat asıl davayı rüyet eden mahkemede hasım tarafından cerhine tasaddi olunmamış bir sened-i resmî ile mecruh olup da ol senedin mahkeme-i mezkûrede tetkik edilmediği sabit olur ise verilen ilâmın hükmü nakz olunur.

Dokuzuncu Madde: Bir ilâmın hükmü kanuna mutabık olsa bile esbab-ı mucibe sırasında madde-i kanuniyeye yanlış mâna verilmesinden neşet etmiş ise nakz olunur.

Onuncu Madde: Bir mukaveleden tahaddüs eden davanın rüyetinde ol mukaveleye dair olan senedin mefad-ı sarihine veyahut ana taalluk eden kanun ve nizamın hükmüne başka türlü mâna verilmiş olur ise ol mukaveleye dair davanın ilâmı nakz edilir.

On Birinci Madde: Bir mahkemede usul-i muhakemeye muhalif olarak rüyet olunan davanın Mahkeme-i Temyiz'de nakz olunabilmesi ol mahkemeye ait vezaifde...