332

Usul-i muhakemenin ihlal olunmasına ve işbu kusur ve hatanın lahik olan hükmü mahv edecek derecede bulunmasına veyahud müddei veyahud müddei aleyh tarafından usul-i muhakemenin tağyir ve ihlal olunduğunu isbat edecek derecede itiraz olunup da mahkemece tetkik kılınmamış olmasına mevkufdur.

On İkinci Madde: Bir ilâmın hükmü mücerred kanuna muğayir bulunması cihetiyle nakz olunup da tashih olunmak üzere bir mahkemeye havale olundukda ol mahkeme asıl maddenin tekrar murafaasına girişmeyerek yalnız nakz edilen hükmü tarafeyn muvacehesinde tashih eder.

On Üçüncü Madde: Bir ilâm mücerred usul-i muhakemece hata vukuundan dolayı nakz olunarak bir mahkemeye havale olundukda ol ilâmı tanzim eden mahkemede mucib-i nakz olan hatanın vukuuna kadar cereyan eden tahkikat ve verilmiş olan kararlar muteber tutulup ve fakat hatanın vukuundan sonra ittihaz edilmiş olan kararlar ilga olunur eğer bu hata maslahatın bidayet-i rüyetinde zuhur etmiş ise ol ilâm tamamıyla menkuz olup maslahat müceddeden rüyet ve fasl olunur ve her halde işbu mahkeme tarafından verilen ilâmın defaten saniye olarak Mahkeme-i Temyiz’de nakzı caiz olur.

On Dördüncü Madde: İki mahkeme tarafından bir dâva hakkında yekdiğerine mübayin olarak verilen ilâmlar müddei ve müddei aleyh ile dâvanın rengi değişmemiş olduğu halde Mahkeme-i Temyiz’de nakz olunur.

On Beşinci Madde: Bir dâvanın tayin-i merci‘i hususundan dolayı birkaç istinaf mahkemeleri veyahud bir istinaf mahkemesine marbut olmayan derece-i ula mehakimi beyninde vuku bulan ihtilafat Divan-ı Ahkâm-ı Adliye’de fasl olunur.

On Altıncı Madde: Bir dâvanın rüyet olunduğu mahkemeden âhar mahkemeye nakli esbab-ı âtiyeden birinin vücuduna muhtacdır evvela Mahkeme-i Ula’nın ekser azası ol dâvada kanunen kabul olunmayacak hal ve sıfatda bulunmasıdır saniyen Divan-ı Ahkâm-ı Adliye’nin şayan-ı kabul esbaba mebni mahkeme-i mezkûreden şüphe eylemesidir.

On Yedinci