334

Hâlde kangı devlet tebeasından bulunduğu ve da‘vâsıyla hulâsa-i edillesi ve temyîzi istid‘â olunan i‘lâmın ne cihetle kânûn ve nizâma mugâyir bulunduğu tahrîr ve arzuhâl sâhibi tarafından imzâ veyâhut temhîr olunmak lâzımdır.

Yirmi Üçüncü Madde
Dîvânın Dîvân-ı Ahkâm-ı Adliye Mahkeme-i Nizâmiyesinde istînâfen rü’yeti istid‘â olunur ise sâhib-i istid‘â haksız çıktığı takdîrde hasmının nizâmen ta‘yîn edecek masârif ve zarar ve ziyânı tazmîne kavî kefîl irâe etmeğe mecburdur. Ve bir i‘lâmın temyîzi istid‘â olunur ise sâhib-i istid‘â istînâf talebi içün beyân olunan şartı îfâ etmekle berâber eğer temyîz istid‘âsı ber-hak îfâ ile mahkûm olub da sûret-i te’diyesi ‘indel-istînâf kefâlet veyâ cihet-i uhrâ ile te’mîn edilmemiş ise mahkûm olan nukûd veyâhut eşyâyı Dîvân-ı Ahkâm-ı Adliye evrâk odasına veyâ kendisine ta‘yîn olunacak dîger bir mahall-i resmîye makbûz senedi mukābilinde teslîm etmeğe veyâhut te’diyesiçün mu‘teber kefîl dahi irâe etmeğe mecburdur.

Yirmi Dördüncü Madde
Bir i‘lâmın temyîzini veyâhut istînâf da‘vâyı istid‘â eden kimesne evvel i‘lâmın aslını veyâ bir sûret-i musaddakasıyla istid‘âsında muharrer i‘tirâzâtın şerh ve îzâhını şâmil bend bend yazılmış bir lâyiha tanzîm ile istid‘âsına rabt edecek veyâ rabt olunmak üzere nihâyet sekiz gün zarfında Dîvân-ı Ahkâm-ı Adliye evrâk odasına i‘tâ eyleyecektir.

Yirmi Beşinci Madde
Yirmi ikinci ve yirmi üçüncü ve yirmi dördüncü maddelerin câmi‘ olduğu şerâite ri‘âyet olunmadığı hâlde istid‘â reddolunur.

Yirmi Altıncı Madde
Bir i‘lâmın temyîzi veyâhut da‘vânın istînâfı içün istid‘â olunabilmesi i‘lâmın teblîği târîhinden i‘tibâren yüz yirmi gün zarfında makbûl olub bu mehil inkızâsından sonra sâkıt olur.

Yirmi Yedinci Madde
Dîvân-ı Ahkâm-ı Adliye’de bir i‘lâmın temyîzine veyâhut istînâf...