34

40 Madde: Âdetin delâletiyle mânâ-yı hakikî terk olunur.
41 Madde: Âdet ancak muttarid yâhud gâlib oldukda muteber olur.
42 Madde: İtibar gâlib-i şâia olup nâdire değildir.
43 Madde: Örfen marûf olan şey şart kılınmış gibidir.
44 Madde: Beyne't-tüccâr marûf olan şey beynlerinde meşrût gibidir.
45 Madde: Örf ile tayin nass ile tayin gibidir.
46 Madde: Mâni ve muktazî taâruz ettikde mâni takdim olunur.
Binâen alâ zâlik bir âdem borçlusu yedinde merhûn olan malını âhara satamaz.
47 Madde: Vücudda bir şeye tâbi olan hükümde dahi ona tâbi olur.
Binâen alâ zâlik bir gebe hayvan satıldıkda karnındaki yavrusu dahi tebean satılmış olur.
48 Madde: Tâbi olan şeye ayrıca hüküm verilemez.
Meselâ bir hayvanın karnındaki yavrusu ayrıca satılamaz.
49 Madde: Bir şeye mâlik olan kimse ol şeyin zarûriyâtından olan şeye dahi mâlik olur.
Meselâ bir hâneyi satın alan kimse ona mûsıl olan tarîka dahi mâlik olur.
50 Madde: Asıl sâkıt oldukda fer dahi sâkıt olur.
51 Madde: Sâkıt olan şey avdet etmez yâni giden geri gelmez.
52 Madde: Bir şey bâtıl oldukda anın zımnındaki şey dahi bâtıl olur.
53 Madde: Aslın îfâsı kâbil olmadığı halde bedeli îfâ olunur.
54 Madde: Bizzat tecviz olunmayan şey bitteba tecviz olunabilir.
Meselâ müşteri mebii kabz için bâyii tevkîl etse câiz olmaz ammâ iştirâ eylediği zahireyi ölçüp koymak için bâyia çuvalı verip o dahi zahireyi çuvala vaz edecek zımnen ve tebean kabz bulunur.
55 Madde: İbtidâen tecviz olunmayan şey bakâen tecviz olunabilir.
Meselâ hisse-i şâiayı hibe etmek sahîh değildir ammâ bir mal-ı mevhûbun bir hisse-i şâiasına bir müstahık çıkıp da zabt etse hibe bâtıl olmayıp hisse-i bâkiye mevhûbün lehin malı olur.
56 Madde: Bakâ ibtidâdan esheldir.