340

Elli yedinci madde: İşbu zabıt maddesiçün baş mümeyyiz maiyetinde bir zabıt kâtibi bulunur.

Elli sekizinci madde: Bir maslahata karar-ı kat’î verildiği tarihden itibaren nihayet on beş gün zarfında mazbata odasında zîrde muharrer usûle tevfîkan ol kararın mazbatası yapılmak lâzım gelir.

Elli dokuzuncu madde: İşbu oda bir ser halife idaresinde olarak iki kısma münkassim ve her bir kısmı bir mukabeleci ile lüzumu mikdar hulefâdan ibaret olup bu kısımların birisinde Mahkeme-i Temyiz’e ve diğerinde Mahkeme-i Nizamiye’ye müteallik mazbatalar tanzim ve kayd olunur.

Altmışıncı madde: Bir kararın mazbatası yapılmak üzere ol kararı mutazammın zabıt varakası evrak-ı müteferriasıyla baş mümeyyiz tarafından müfredatlı makbuz pusulası mukabilinde mazbata odası ser halifesine i’tâ olunarak mazbatası yapıldıktan sonra evrakı yine orada hıfz olunur.

Altmış birinci madde: Zabıt varakaları yapılacak mazbatalara esas ittihaz olunur. Her mazbata metninde istidanın tarih ve numarası ve zübde-i meâli ve tarafeynin isim ve şöhret ve mahall-i muayyenleri ve san’at ve sıfatlarıyla husûs-ı münâzaun-fîhin ve tahkikat-ı vâkıanın hülâsası ve esbâb-ı kanuniyesiyle verilen hüküm ve karar derc ve beyan olunur. Müsveddeyi kaleme alan kâtib imza eder.

Altmış ikinci madde: Mazbatası kaleme alındıktan sonra ser halife tarafından mahkeme veyâ daire baş mümeyyizine i’tâ olunur. Baş mümeyyiz dahi sebk ve rabtına ve verilen karara muvafık olmasına dikkat ve icab eden yerlerini tashih ile baş kâtibe irâe eyledikten sonra meclisde kıraatle kabul olunduğu halde mahkeme veyâ daire reisiyle beraber imza ederek tebyîz olunmak üzere yine mazbata odasına iade eder.

Altmış üçüncü madde: Mazbata müsveddelerinin tebyîz ve kaydıçün mazbata odasında masâlih-i vâkıanın cinsine göre bir kıt’a sicil tutulup...

*Her müsvedde*