342

Ve kararın suret-i musaddakaları mevki-i icraya isal olunacağı gibi bu davalardan tehaddüs etmiş olan hukuk davasına dair yapılmış olan ilamın bir nüshası balada muharrer usule tevfikan mahkumun aleyh olan tarafa tebliğ olunur.

Altmış dokuzuncu madde: Divan-ı Ahkam-ı Adliye’de bir ilamın nakzı zımnında verilen karar ol ilamı vermiş olan mahkemenin bir defter-i mahsusa kaydolunmak ve ilam kaydı balasına şerh verilmek üzere ol mahkemenin reisine tebliğ ettirilir.

Yetmişinci madde: Divan-ı Ahkam-ı Adliye’nin bilcümle umur-ı kalemiye ve tahririyesi baş katibin zir-i nezaretinde bulunur. Divan-ı Ahkam-ı Adliye’den çıkan ilamat ve tezakir ve muharrerat-ı saire müsveddeleri baş katip tarafından görüldükten sonra muamelatı icra olunur.

Yetmiş birinci madde: Tarife-i mahsusasında beyan olunan muhakeme masarifini haksız çıkan taraftan istihsal eylemek üzere evvel emirde haklı çıkan taraf evrak odasına tediye ve teslime mecburdur.

Yetmiş ikinci madde: Ahzolunan rüsumat evrak odasında bir defter-i mahsusa müfredat vechile kaydolunur sahibine koçandan maktû bir makbuz senedi verilir.

Yetmiş üçüncü madde: İşbu rüsumattan Divan-ı Ahkam-ı Adliye masarif-i kırtasiye ve sairesi ba’de’t-tesviye fazlası ba-defter-i mahsus maliye hazine-i celilesine gönderilir.

( Madde-i Muvakkate )

Divan-ı Ahkam-ı Adliye’nin rü’yet edeceği deavi hakkında Ticaret Usul-i Muhakeme Nizamnamesi’nin işbu nizamnameye mugayir olmayan ahkamı mer’iyyü’l-icra tutulacaktır. Ve Divan-ı Ahkam-ı Adliye kavanin-i cariyede bi’t-tecrübe gördüğü noksanın ikmalini ve muhtac-ı tadil olan fıkaratın ıslahını mutazammın her sene hitamında bir mazbata tanzim ve arz edecektir.

Fi 13 Zilkade sene 1286

Havale