351

On üçüncü madde: İ'lâm sûretinin ihrâcı içün Dîvân-ı Ahkâm-ı Adliye'nin ta'rife-i mahsûsasında muharrer olduğu üzre iki beyâz yirmilik mecîdiye ve teblîği içün bir beyâz yirmilik mecîdiye ahz olunur.

On dördüncü madde: Hademe masârifi içün Kapan-ı Dakîk ve At Pazarı ve Fâtih ve Sarâchâne Başı ve Sôfîler ile postalar dâhilinde bulunan mahaller içün bir beyâz beşlik ve Dâvud Paşa İskelesi ve Cerrâh Paşa ve Çârşenbe ve Küçük Mustafâ Paşa ile postalar dâhilinde bulunan mahaller içün iki beyâz beşlik ve şehir hâricinde bir o tarafdan Bahâriye'ye kadar ve karşı tarafdan Sütlüce'den Kâsım Paşa'ya ve Azab Kapusu'ndan Sâlı Pazarı'na ve Beg Oğlu'na kadar olan mahaller içün bir beyâz beşlik ve Silivri Kapusu ve Top Kapu ve Mevlevîhâne Kapusu'na ve Tatavla ve Pangaltı ve Feriköy'üne kadar olan mahaller içün üç beyâz beşlik ahz kılınur. Ve Rûmili ve Anadolu kavâğına ve Ayastefanos ve Pendik ve Adalar'a kadar sâhil ve civâr bulunan mahallere gidecek hademenin gidüb gelme vapur ücretiyle köprü pâresi bi'l-hisâb her ne eder ise bir misli zamm olunarak istîfâ olunur. Ve sâhilden ba'îd olan mahallere gidüb gelmek içün bârgîr ücreti dahi ilâve edilir. Ve bir günde avdet kâbil olamayub gice yatmağa ihtiyâc olduğu takdîrde masârif-i vâkı'aya mukâbil başkaca iki beyâz beşlik dahâ alınur.

Fî 6 Şa'bân sene 1287 ve fî 19 Teşrîn-i Evvel sene 86