358

Altıncı madde: Nihayet beş bin guruş kıymet veyahud senevî beş yüz guruş irad üzerine tekevvün eden deâvi ile üç aya kadar habis ve beş aded yüzlük altununa kadar cezâ-yı nakdîyi icab eden cünha davalarını kabil-i istinaf olmak üzere rü'yet eder. Vukuat-ı cinâyatda dahi tahkikat-ı evveliye icra eyler.

( Nev-i Sâni )
( Merkez Bidâyet Mahkemeleri Beyânındadır )

Yedinci madde: İstanbul'da iki ve Üsküdar ve Beyoğlu merkezlerinde birer merkez bidâyet mahkemesi teşkil kılınmışdır. Bunlar ikişer dâireye münkasım olub biri dâire-i hukuk ve biri dâire-i cezâiyedir.

Sekizinci madde: Merkez bidâyet mahkemelerinin münkasım olduğu dâireler birer reis ile ikişer a'zâdan mürekkebdir. Ve maiyetlerinde ikişer mümeyyiz ve lüzumu kadar zabıt kâtibi ve hademe bulunacakdır.

Dokuzuncu madde: Merkez bidâyet mahkemeleri üçüncü ve dördüncü maddelerde beyan olunan kâideye tevfikan icrâ-yı muhâkeme edecekler.

Onuncu madde: Mümeyyiz ve zabıt kâtiblerinin deâvi-i vâkıanın tedkik ve rü'yetince ve umûr-ı tahrîriyesince olan vazîfeleri nizâm-ı mahsûs ile ta'yin olunacakdır.

On birinci madde: Hademenin vazîfesi celb ve ihzâr ve tebliğ gibi mübaşirlikden ibaret olub sûret-i icraât ve cihât-ı sâiresi nizâm-ı mahsûs ile ta'yin olunacakdır.

( Kısım Evvel )
( Merkez Bidâyet Mahâkimi ve Devâir-i Hukûkiyesinin Vezâifi Beyânındadır )

On ikinci madde: Dâire-i hukûkiyenin nihayet beş bin guruş kıymet veyahud senevî beş yüz guruş irad üzerine tekevvün eden deâviye verdikleri hükümler kabil-i istinaf değildir. Re'sü'l-mal bu mikdardan aşağı olub da terâküm eden fâizin zammıyla mecmuun mikdarını tecavüz eylese yakhud asıl davaya...