36

69 Madde Mukâtebe muhâtaba gibidir.
70 Madde Dilsizin işâret-i ma’hûdesi lisân ile beyân gibidir.
71 Madde Tercümânın kavli her husûsda kabûl olunur.
72 Madde Hatâsı zâhir olan zanna i’tibâr yokdur.
73 Madde Senede müstenid olan ihtimâl ile hüccet yokdur.
Meselâ bir kimse veresesinden birine şu kadar kuruş borcu olduğunu ikrâr etdiği takdîrde eğer maraz-ı mevtinde ise dîger verese tasdîk etmedikçe bu ikrârı hüccet değildir zîrâ dîger vereseden mâl kaçırmak ihtimâli maraz-ı mevte müsteniddir ammâ hâl-i sıhhatde ise ikrârı mu’teber olur ve ol hâlde olan ihtimâl-i mücerred bir nev’i tevehhüm olduğundan ikrârın hücciyyetine mâni’ olmaz.
74 Madde Tevehhüme i’tibâr yokdur.
75 Madde Burhân ile sâbit olan şey ‘ıyânen sâbit gibidir.
76 Madde Beyyine müdde’î içün ve yemîn münkir üzerinedir.
77 Madde Beyyine hilâf-ı zâhiri isbât içün ve yemîn aslı ibkâ içündür.
78 Madde Beyyine hüccet-i müte’addiye ve ikrâr hüccet-i kâsıradır.
79 Madde Kişi ikrârıyla mu’âheze olunur.
80 Madde Tenâkuz ile hüccet kalmaz lâkin mütenâkızın aleyhine olan hükme halel gelmez meselâ şâhidler şehâdetlerinden rücû’ ile tenâkuz etdiklerinde şehâdetleri hüccet olmaz lâkin evvelki şehâdetleri üzerine kâdî hükm etmiş ise bu hükm dahi bozulmayıp mahkûmun bihi şâhidlerin tazmîn etmesi lâzım gelir.
81 Madde Asıl sâbit olmadığı hâlde fer’in sâbit olduğu vardır.
Meselâ bir kimse fülânın fülâne şu kadar kuruş deyni vardır ben dahi aña kefîlim dese ve asîlin inkârı üzerine dâin iddi’â etse meblağ-ı mezbûru kefîlin vermesi lâzım gelir.
82 Madde Şartın sübûtu zımnında aña mu’allak olan şey’in sübûtu lâzım olur.
83 Madde Bi-kaderi’l-imkân şarta ri’âyet olunmak lâzım gelir.
84 Madde Va’dler sûret-i ta’lîk iktisâ ile lâzım olur.
Meselâ sen bu mâlı fülân adama sat eğer akçesini vermez ise ben veririm dese