365

( Mahâkim-i şer’iye ve nizâmiyede rü’yet ve hükm olunan da’vâlardan cânib-i mîrî )
( içün ahzı mukarrer olan harc-ı senedâtın ve mahkûmunbih olarak hükûmet )
( ma’rifetiyle tahsîl olunan mevâdd-ı hukukiyeden kezâlik cânib-i mîrî içün )
( alınacak rüsûmât-ı tahsîliyenin sûret-i istihsâl )
( ve istîfâsı hakkında nizâmnâmedir )

( Mevâdd-ı hukukiyenin müteallik olduğu mahallere sûret-i ihâlesi )
( ve harc ve rüsûmâtın mahall-i istîfâsı )

Birinci Madde: Küçük büyük bir maslahat-ı hukukiye içün ashâbı tarafından kazâlarda müdîre ve sancak başlarında mutasarrıf veyâ muâvinine tahrîren veyâ şifâhen mürâcaat olundukda zât-ı maslahat mahkeme-i şer’iyeye müteallik ise oraya ve nizâmen rü’yet olunacak ise kazâlarda da’âvî ve re’s-i sancaklarda temyîz-i hukuk meclislerine ve ticârete dâir ise re’s-i livâdaki mahkeme-i ticârete havâle kılınub mutasarrıf ve muâvinleri ve kazâ kâimmakâmları hiç bir mâdde-i hukukiyeyi rü’yet ve hükm etmeyeceklerdir fakat da’vâ olunan şey’in kıymeti kırk guruşlukdan aşağı olub da terâzî-i tarafeyn ile tesviye olunur ise bilâ-havâle sulhan bitirilüb bu makûle da’vâ-yı cüz’iye-i sulhiye içün hiç bir akçe resm ve harc alınmayacaktır.

İkinci Madde: Ticâret mahkemelerinden verilen mazbata ve i’lâmların ber-mûceb-i nizâm muayyen olan harcları reîs ve a’zâ ve kâtib ve hademesi vezâifine karşılık olarak yine ticâret mahkemelerinde alınıb bundan mâadâ havâleli ve havâlesiz işler içün gerek mahâkim-i şer’iyeden verilen hüccet ve defter-i kassâm ve izinnâme gibi kâffe-i senedât-ı şer’iyenin ve gerek temyîz-i hukuk ve da’âvî meclislerinde görülüb hükm olunan mâddeler içün verilecek mazbataların harcları ve mahkûmunbih olan nukûd ve eşyâ ve sâirenin hükûmet ma’rifetiyle hîn-i tahsîlinde rüsûm-ı tahsîliyesi kazâlarda da’âvî ve sancak başlarında temyîz-i hukuk meclislerinde alınacaktır.

Üçüncü Madde: Mahâkim-i şer’iyeden verilen vesâik ve senedât-ı şer’iye