380

On dokuzuncu madde — Ânifü'z-zikr maddede tasrih olunan memnuiyete muhalefet eden komanditer şirketin bi'l-cümle düyûn ve taahhüdâtı içün mütekeffil ve müteahhid olmak lâzım gelir.

( Nev-i Sâlis )

Yirminci madde — Anonim ta'bir olunur tesmiyesiz şirketin ticaret usûlü üzere şirket unvanı olmayıp hiç bir hissedarın ismiyle ta'rif olunamaz.

Yirmi birinci madde — Şirket-i mezkûre mebnî aleyhâ olan eşyanın tasrihiyle mevsûfdur.

Yirmi ikinci madde — Şirket-i merkûmenin sûret-i idâresi muvakkaten tevkîl ve azl ve nasbları câiz olan kimseler ma'rifetiyle icra olunup işbu vekîller ise şerik ve şerikin gayrı ve muvazzaf ve bilâ-vazîfe olması müsâvîdir.

Yirmi üçüncü madde — Müdîrler yalnız muhavel uhdeleri olan vekâletin icrâsı içün mes'ûl olup şirketin umûrunu idâre eylemesinden dolayı şirketin taahhüdâtına dâir medyun ve kefil değildirler.

Yirmi dördüncü madde — Hissedarlar şirket sermâyesine koydukları hisselerden ziyâde zarar ve ziyanı dâmin değildir.

Yirmi beşinci madde — Tesmiyesiz şirketin sermâyesi bir takım eshâme ve eshâm dahi meblağı mütesâvî bir takım hisselere münkasim olur.

Yirmi altıncı madde — Sehm senedâtında sâhibleri ismi tasrih olunmamak üzere tanzim olunan kumpanya eshâmı senedi her kimin yedinde bulunur ise sehmin mutasarrıfı olup fürûhtu dahi senedin teslîmiyle olur.

Yirmi yedinci madde — Sehm senedâtında ashâbı esâmîsi musarrah olmak üzere tanzim olunan kumpanya eshâmı senedâtının kumpanya defâtirinde mukayyed olması ve fürûhtu dahi kumpanya tarafından hâmiş-i senede şerh verilerek vaz'-ı imzâ ve kumpanya defterlerine kayd ve imlâ ile icra kılınması lâzımdandır.

Yirmi sekizinci madde — Tesmiyesiz şirketin akd ve tanzîmine evvel emirde...
*Bâ-fermân*