384

Tekmîl olduğu takdirde heman yedlerine teslim olunmuş olan evrak ve müzakerelerin mütalaasıyla davanın rüyet ve hükmüne mümeyyizlik salâhiyeti derkârdır.

Kırk Dokuzuncu Madde: Mümeyyizler beyninde ihtilâf-ı ârâ vukuunda diğer bir mümeyyizin ismi mukavele senedinde mezkûr değil ise mümeyyizler tarafından tayin olunup ancak intihabı hususunda müttefikü’l-re’y değiller ise ticarethâne tarafından diğer mümeyyizin tayini lâzım gelir.

Ellinci Madde: Mümeyyizlerin hüküm ve i’lâmı esbab ve delâile mebni olmak ve hiç bir gûne ta’dil ve tağyiri kabil olmaksızın aynile icra olunup Ticaret Nâzırının emrile ticarethâneye kayd ve tescil ve üç gün zarfında teslim ve i’tâ olunmak lâzımedendir ( * )

Elli Birinci Madde: Şeriklerden biri vefat eyledikde ma’kud olan şirketi münfesih olup ticarete dâir olan muhasebatı mukaddemâ şürekâsile akd eylemiş olduğu mukavelât ve kontratoları mucibince bâlâda muharrer şerâita tatbikan ticarethânede rüyet olunmasına veresesi mecbur ola.

Elli İkinci Madde: Ticaret şirketine müteallik bir muârazadan dolayı ba’zı sabî ve sağîrin mümeyyiz ma’rifetile rüyet olunmuş olan da’vâlarının sabîleri sıyâneten bi-tekrar ticarethâneye naklini iddiâ eylemeğe vasî mecburdur ( 3 )

( Fasl-ı Râbi’ Komisyon Ya’ni Sipariş Tarîkile Ticaret Beyânındadır )

Elli Üçüncü Madde: Komisyoncu ya’ni siparişkâr tacir ona derler ki bir müvekkilin hesabına mahsuben kendü ismile veyahud bir şirket unvanile muamelât-ı ticareti icra eyleye.

---------------------------------
( * ) Metinde beyan olunan esbab ve delâilden murad hükm olunan husus Kanun-ı Ticaretin kaçıncı maddesine tatbikan rüyet ve hükm olunmuş ise yazılan i’lâmda beyan olunması lâzım gelir demek olur.

( 3 ) O makule vefat eden şerîkin ba’de’l-muhasebe zuhur eden emvâli verese-i sağîresi olduğu halde sıyâneten li’l-yetîm vereseye verilmeyip terekesi tarafına verilmesi müteallik buyurulan irâde-i aliyye icabından olduğu

* Elli dördüncü *