391

Seksan sekizinci mâdde: Viste ya’nî görüldüğü anda te’diyesi meşrût olan poliçeler ibrâz olunduğu anda te’diye kılınır.

Seksan dokuzuncu mâdde: İbrâzı gününden bir ve müteaddid yevm ve mâhdan sonra te’diye olunmak üzere olan poliçenin va’desi kabûlü târîhinden ve adem-i kabûlüne dâir protesto zuhûrunda protesto kâğıdının târîhinden i’tibâren ta’yîn ve tahsîs kılınır.

Toksanıncı mâdde: Bir panayırda te’diye olunacak poliçenin va’desi hemân panayırın hitâmına mahsûs günden bir gün evvel hulûl edip panayırın yalnız bir gün müddeti olur ise ol panayırın gününde va’desi zuhûr eder.

Toksan birinci mâdde: Poliçenin va’desi hasbe’l-kânûn yortu sayılan günlerden birine tesâdüf eder ise ol yortudan bir gün evvel te’diye kılınır.

Toksan ikinci mâdde: Poliçelerin te’diyesiçün mürâ’ât ve müsâ’ade ve âdet-i belde kabîlinden olarak her dürlü mehil i’tâsı keyfiyeti lağv olunmuşdur.

( Ciro ya’nî havâle keyfiyeti beyânındadır )

Toksan üçüncü mâdde: Poliçenin istishâb ve temellükü devr ve havâle tarîkıyle birbirine intikâl eder.

Toksan dördüncü mâdde: Poliçe tahvîlleri üzerinde devr ve havâlenin târîhi olmak ve poliçenin meblağı ahz olunduğunu beyân etmek ve her kimin uhdesine geçmiş ise anın ismini zikr eylemek lâzımdır.

Toksan beşinci mâdde: Havâle keyfiyeti sâlifü’z-zikr mâddede beyân olunan şerâita muvâfakat etmediği hâlde poliçenin intikâl ve devri icrâ olunmayıp âdetâ vekâletnâme kabîlinden olur.

Toksan altıncı mâdde: Poliçenin havâlâtına yazıldığı günden evvel târîh koymak memnû’ olup her kim bunu irtikâb eder ise sahtekâr olmak üzere add ve şümâr olunur.

Toksan yedinci mâdde: Poliçe kâğıdını imzâ ve kabûl etmiş ve gerek devr ve havâlesini der-uhde eylemiş olanların cümlesi hâmili indinde birbirine mütekeffil olmak üzere add olunur.