397

... ve ahz itdiği takdirce akçeyi viren dahi kendüden mukaddem olan ashab-ı havalatdan ve gerek poliçeyi keşide iden adamdan gerek mecmuundan birden ve gerek münferiden her birinden devr ider ise poliçeyi keşide iden adama varınca her bir müddei hakkında mühlet-i mezkûre cari ve muteberdir ve mühlet-i mezkûrenin ibtidası her bir müddeinin davaya tasaddi itdiği günün ferdasından add ve itibar olunur.

Yüz yigirmi beşinci madde: Ber-vech-i meşruh görüldüğü anda ve gerek bir ve müteaddid yevm ve mah vade ile te'diyesi lazım gelen poliçenin ibrazı ve adem-i te'diyesine dair protestonun icrası ve kefalet iddiası hususlarıçün vaz' olunan mühletlerin inkizasından sonra bir poliçenin hamili ashab-ı havalat aleyhinde bir vechle dava edemeyip ol babda asla selahiyeti kalmadığı derkârdır.

Yüz yigirmi altıncı madde: Ashab-ı havalatın dahi her birine raci' olduğu mertebede marüzzikr mühletlerin inkizasından sonra poliçeyi kendilerine ferağat etmiş kimseler aleyhinde kefalet davasını etmeğe istihkakları yoktur.

Yüz yigirmi yedinci madde: Kezalik poliçenin vadesi hululünde karşılığını isal eylediğini keşide iden adam isbat edebilür ise merkumun aleyhine dava etmeğe poliçenin hamili ve ashab-ı havalatın istihkakları kalmaz ve bu takdirde her kimin üzerine poliçe keşide olunmuş ise yalnız ol kimse aleyhine dava etmeğe hamilin istihkakı derkârdır.

Yüz yigirmi sekizinci madde: Protesto kâğıdının tahrir ve ilanı içün ve gerek mahkemeye davet içün balada muharrer tayin olunan mühletlerin inkizasından sonra poliçeyi keşide etmiş olan kimse veyahut ashab-ı havalatdan biri nakden veyahut bir hesaba mahsuben veyahut başka bir takrible poliçenin te'diyesine mahsus meblağa destres olur ise marüzzikr üç maddelerde mezkûr olduğu üzere davaya adem-i selahiyet keyfiyeti bertaraf olup poliçenin akçesini gerü almış olan kimse aleyhinde iddia etmeğe az-ser-i nev hamilin istihkak ve selahiyeti hasıl olur.