Gülhane’de kırâat olunan Hatt-ı Hümâyûn’un sûretidir

Cümleye ma'lûm olduğu üzere Devlet-i Aliyye’mizin bidâyet-i zuhûrundan berü
ahkâm-ı celîle-i Kur’âniye ve kavânîn-i şer’iyeye kemâliyle riâyet olunduğundan saltanat-ı
seniyye’mizin kuvvet ve meknet ve bi’l-cümle tebaasının refâh ve ma'mûriyeti rütbe-i gâyete
vâsıl olmuşiken yüz elli sene vardır ki gavâil-i müteâkibe ve esbâb-ı mütenevviaya
mebnî ne şer’-i şerîfe ve ne kavânîn-i münîfeye inkıyâd ve imtisâl olunmamak hasebiyle
evvelki kuvvet ve ma'mûriyet bi’l-akis za’f ve fakra mübeddel olmuş ve hâlbuki kavânîn-i
şer’iyye tahtında idâre olunmayan memâlikin pâyidâr olamayacağı vâzıhâtdan bulunmuş
olup cülûs-ı hümâyûnumuz rûz-ı firûzundan berü efkâr-ı hayriyet-iştimâ-i mülûkânemiz dahi
mücerred i’mâr-ı memâlik ve enhâ ve terfîh-i ahâlî ve fukarâ kasdiyye-i nâfiasına münhasır ve Memâlik-i
Devlet-i Aliyye’mizin mevki-i coğrafîsine ve arâzî-i münbitesine ve halkın kâbiliyet
ve isti’dâdlarına nazaran esbâb-ı lâzımesine teşebbüs olunduğu hâlde beş on sene
zarfında tevfîk-i Teâlâ suver-i matlûbe hâsıl olacağı zâhir olmağla avn ve inâyet-i
Hazret-i Bârî’ye i’timâd ve imdâd-ı rûhâniyet-i Cenâb-ı Peygamberî’ye tevessül ve istinâd
birle bundan böyle Devlet-i Aliyye ve Memâlik-i Mahrûsa’mızın hüsn-i idâresi zımnında