417

Ve gerek ihtiyaten deftere idhal ettirilmiş olan alacaklılar bizzat gelerek
veyahut vekillerini irsal ederek memur-ı mumaileyh hazır olduğu halde
meclis akdine ve meclis-i mezkûra müflisin dahi celbine mübaderet oluna.
Müflis-i merkûm hapishaneden ihrac olunmuş veyahut temin-namesini tahsil
etmiş ise bizzat gelmeğe mecburdur meğerki memur-ı mumaileyh tarafından makbul
olan özr-i şer’i tahakkukuna mebni aharını tevkile salahiyeti ola.

İki yüz on üçüncü madde: İflasın keyfiyet-i ahvali ve gerek rüsum ve kavaid-i
mer’iyesinin icrası ve muamelat-ı icabiyenin ifası vekiller tarafından
salifüzzikr akd olunacak meclise arz ve ifade olunduktan ve ol halde
müflis dahi istintak ve istima kılındıktan sonra meclisçe vekillerin ifadat-ı
vakıaları bir kıt’a varakaya zabt ve tahrir ve taraflarından imza ve temhir
olunarak varaka-i merkûme ticarethane tarafından tayin kılınan memura teslim
ve memur-ı mumaileyh tarafından dahi meclisçe olan müzakere ve kararı havi
bir kıt’a takrir tanzim kıluna.

( Fasl-ı Sani Konkordato senedinin sureti )
( Akd ve tesviyesi hakkındadır )

İki yüz on dördüncü madde: Zikr olunan rüsum ve kavaide riayet ve tamamen
icra olunmazdan evvel hazır bi’l-meclis olan ashab-ı düyun ile müflis-i medyun
beyninde bir gûna mukavele akdi caiz değildir balada muharrer olduğu üzere
kat’iyyen tasdik ve kabul veyahut ihtiyaten deftere idhal olunmuş olan
düyunun üç rub’una mutasarrıf ve aded cihetiyle ekser ve ağleb olan
alacaklıların indimam-ı re’y ve marifetleriyle akd olunan mukavele muteber olup
kavaid-i merkûmenin adem-i icrası takdirinde mukavele senedi mer’i
ve muteber değildir.

İki yüz on beşinci madde: İstiğlal ve rehin ve imtiyaz cihetleriyle alacakları
muhakkak olan alacaklılar bu misillü alacaklarıçün konkordato senedine dair
muamelatda re’ylerini söylemeğe salahiyetleri yoktur fakat istiğlal ve rehin
ve imtiyazlarından ferağat ederler ise bunların alacakları dahi deftere idhal
ve mahsub kılınır madamki konkordato senedi akdi zımnında meclise
[l] 53