426

İkiyüz kırk birinci madde - Müflisin menkulâttan olmayan emlakini ve gerek menkulâttan olan emtia ve eşyasını füruht ile düyun ve zimemâtının tanzim ve tesviyesi maddelerini tacil etmek üzere vekiller mecburdur. Ve hususât-ı mezbûreye ticarethaneden tayin kılınan memur nezaretiyle teşebbüs olunup müflisin celb ve ihzarı lazım gelmez.

İkiyüz kırk ikinci madde - Sâlifü’z-zikr yüz doksan beşinci maddede muharrer kaideye imtisâlen müflise ait her gûne hukuk ve iddiayı tesviye ve rüyet etmek üzere vekiller me’zun olup ol babda müflisin muhalefeti mesmû değildir.

İkiyüz kırk üçüncü madde - Ber-vech-i bâlâ ittifak üzere olan alacaklılar ittifaklarının ibtidâ-i senesinde hiç olmaz ise bir defa ve icap eylediği halde âti senelerinde iktizasına göre akd-i meclis etmek üzere ticarethaneden tayin kılınan memur marifetiyle celb olunur. Ve mecâlis-i merkûmede vekiller iflas umûrunu ne vechle idare ve tesviye ettiklerinin takririni vermeye mecburdurlar. Ve bâlâda mezkûr yüz yetmişinci ve ikiyüz otuz altıncı maddelerde tasrih olunan kaidelere tatbikan memuriyetlerinde ibka veyahut icabına göre azl ve tebdilleri icra olunur.

İkiyüz kırk dördüncü madde - Müflisin hesapları kat’ ve tesviye olundukta alacaklılar ticarethaneden tayin kılınan memur marifetiyle celb olunup vekiller dahi işbu son mecliste memuriyetlerinin neticesinden takrirlerini vererek müflisin bin-nefs bulunması veyahut iktizası üzere celb ve ihzar olunması lazımdandır. Ve müflisin mazuriyet-i ahvaline dair ashab-ı matlubat reylerini söyleyip ol babda bir kıta zabıta tahrir ile alacaklıların her biri mülahazat ve itirazatı ol zabıtada derc eylemek üzere me’zun olup meclis-i mezbûrun hitamından sonra müttefik alacaklıların cemiyeti bi'l-istihkak hall ve tefrik olunur.

İkiyüz kırk beşinci madde - Müflisin mazuriyet-i ahvaline dair alacaklıların karar reyleri ve gerek iflasın keyfiyet ve vukuu ve hâlât-ı sâiresine mütedâir bir kıta takrir ticarethane memuru tarafından arz ve takdim olunup

*müflisin*