438

Me’mur-ı mûmâileyhden istintak ve sual olundukdan sonra icabı ticarethâne tarafından hükm olunur.

( On birinci bab iflas hükmü sudurunda mugayeretine )
( dair iddia beyanındadır )

İki yüz seksen altıncı madde – Gerek iflasın ilanını mübeyyin ve gerek müflisin ifay-ı deynden aczine mebde’ olmak üzere tarih tayinini mutazammın sudur etmiş olan hükm ve ilamların aleyhine vuku bulan muhalefet ve itiraz müflis tarafından ise sekiz gün ve sair alakadarlar canibinden olur ise bir ay müddet içre caizdir ve işbu mühletlerin ibtidası yüz elli ikinci maddede muharrer olduğu vechle iflasın merasim-i neşr ve ilanı icrası gününden itibar olunur.

İki yüz seksen yedinci madde – Ber-vech-i muharrer iflasın ilanı ve müflisin ifay-ı deynden aczine mebde’ olmak üzere tarih tayini zımnında sudur etmiş olan hükm ve ilamlar mantukunca müflisin ifay-ı deynden aczine mebde’ olmak üzere vaz’ ve tayin olunan vakti tebdil ve vakt-i âhire nakl ve tahvil eylemek hususuna dair alacaklıların her gûna vuku bulan iddiaları zimemâtın tasdik ve tahkiki zımnında tayin olunan mühletlerin inkızasından sonra mesmu değildir ve zikr olunan mühletlerin inkızasından sonra müflisin ifay-ı deynden aczi keyfiyetinin tarihi mukaddema tayin olunduğu üzere kalarak bir vechle tağyir ve tebdil kabul etmeyip bi’l-cümle alacaklılar hakkında mer’iyyü’l-icradır.

( Fasl-ı sani taksiratlı ve hileli iflas beyanında olup bu dahi )
( çend babı müştemildir )

( Bab-ı evvel taksiratlı müflis beyanındadır )

İki yüz seksen sekizinci madde – Taksiratlı iflas zuhurunda vekillerin ve bi’l-cümle alacaklının iddiasıyla müflisin taksirat-ı vakıası ticarethânede meclisçe tebeyyün ve tahakkuk eyledikten sonra Ticaret Nezaretinin inhası üzere ber-mucib-i kanun te’dibat-ı icabiyesinin icrası hükm olunur (*)

---
(*) Taksiratlı müflisin te’dibi habisten ibaret olup icabına göre bir aydan akall ve iki seneden ziyade olamaz.

İki yüz