455

Mübeyyin bir şehadetnameye nail olacaklardır. İşbu şehadetnamenin verilip verilmemesi reis ve daimi azadan mürekkep mecliste her biri tarafından hafiyen rey verildikten sonra hasıl olacak ekseriyet-i ârâ üzerine tanzim olunacak zabıta mucibince tanzimiyle şehadetname-i mezkûr mahkemenin mührüyle temhir ve ita olunacaktır. Zikr olunan zabıtanın bir kıt'a suret-i resmiyesi reis tarafından mahkemenin divanhanesine talik ile ilan ettirilecektir.

Kırk beşinci madde: Mahkeme-i ticarete havale olunan bilcümle istidalar vürûd ettikçe sırasınca numro ve işaretiyle kalemde bulunacak bir defter-i mahsusa kayd olunacaktır. İşbu kayd maddesi kaydın tarihi ve tarafeynin isim ve şöhretleri ve hangi devlet tebasından oldukları ve mahal-i ikametleri ve hamil-i istida olan mübaşirin kezalik isim ve şöhretleriyle hangi daire hizmetinde bulundukları ve davanın neye dair olduğu beyanından ibaret olacaktır. İşbu kaydın numrosu ve tarihi istidanın zahrına dahi nakl ve işaret olunacaktır.

Kırk altıncı madde: Hiçbir dava madde-i ânifede beyan olunan ahkam vechile kayd olunmadıkça rü'yetine şurû olunmayacaktır.

Kırk yedinci madde: Hamil-i istida olan mübaşir zikr olunan kaydı eyyam-ı resmiye ve tatiliyeden maada havale buyurulduğu tarihinden itibaren nihayet yirmi dört saat zarfında icra ettirmeye mecbur olacaktır. Bu hususta bir kusur eder ise ibtida tevbih olunup ikinci defasında dahi mübaşirlik memuriyetinden tard olunacaktır.

Kırk sekizinci madde: Meclise celb olunacak davaların pusulası muhakemesi icra olunacak günden la-akal üç gün evvel kaydı tarihi defterinden sırasıyla bil-ihrac Türkçe ve mahallinde ekseriyet üzere istimal olunan sair lisanca bit-tanzim reisin emir ve tenbihiyle mahkeme divanhanesine talik olunacaktır. Fakat sekustro ve sair müstacel davaların pusulası defterinden tefrikan bit-terkim rü'yeti sair davalardan mukaddem olmak üzere başkaca talik kılınacaktır.