466

(Sûret-i Hatt-ı Hümâyûn)
(Mûcebince amel oluna)

(Kânunnâme-i Hümâyûn Ticâret-i Bahriye)
(Birinci Fasıl)

(Gemi ve Sâir Merâkib-i Bahriye Hakkındadır)

Birinci Madde: Bir kimse Devlet-i Aliyye teb^asından olmadıkça Osmanlı sancağını hâmil olan sefînenin gerek mecmû^una ve gerek hissesine mâlik ve mutasarrıf olamaz fakat teb^a-i Osmâniye tasarrufunda bulunan sefînenin mecmû^u tâbiiyet-i Osmâniyesini ta^yîn eden berât ve evrâkı istirdâd olunarak ecnebiye fürûht olunabilir.

İkinci Madde: Devlet-i Aliyye teb^asından olanlar sefâin-i ecnebiyeye mutasarrıf olmağa ve ol sefâini sefâin-i Osmâniyeye mahsûs şerâita tatbîkan Osmanlı sancağı keşîdesiyle seyr ü sefer etdirmeye me’zûn olup fakat bu misillü ecnebi sefînelerinin hîn-i iştirâsında tarafından yapılacak kontrato senedine madde-i sâbıka hükmüne mugâyir olarak bir ecnebinin menfaatiçün bir gûna şart ve mukâvele derc ve imlâ olunmayacaktır olunur ise ol sefâin cânib-i mîrîden zabt kılınacaktır.

Üçüncü Madde: Bir sefînenin gerek seferinden evvel ve gerek esnâ-yı seferinde kâmilen veyâ hisseten bi’r-rızâ fürûhtı husûsu memâlik-i Devlet-i Aliyye’de vukû^ bulur ise mahallî ticâret meclisinde veyâ kançılaryasında ve memâlik-i ecnebiyede vâki^ olur ise Devlet-i Aliyye şehbenderleri ya^ni konsolosları muvâcehesinde sened-i resmî ile icrâ olunacaktır eğer bu yolda olmaz ise bey^ ve fürûhtı ke-en-lem-yekün hükmünde tutulacaktır ve bu fürûht keyfiyeti Memâlik-i Mahrûse-i Şâhâne’den ticâret-i bahriye meclisi ve kançılaryası olmayan mahalde olur ise memleket meclisinde icrâ olunarak ol mahalle en yakîn bulunan ticâret-i bahriye meclisi veyâ kançılaryasına ihbâr olunacaktır ve memâlik-i ecnebiyeden Devlet-i Aliyye konsolosu bulunmayan mahalde vukû^ bulur ise keyfiyeti bildirmek üzere yakîninde bulunacak Devlet-i Aliyye konsolosuna haber verilmek şartıyla
İcrâ