469

Verilen akçe ve eşya-yı saire dahi geminin sahibi tarafından iki nüsha üzere tanzim ve kapudanı tarafından tasdik olunup bir nüshası geminin kıyam ve hareketinden evvel veyahut bundan nihayet on gün sonra meclis-i ticaret kalemine veya ticaret kançilaryasına emaneten vaz‘ olunan pusula ve ilmühaberler ile ispat olunacaktır. Sabian sefinenin teknesi ve takım ve âlâtı ve donatması ve levazımat-ı sairesi üzerine sefinenin hareketinden evvel vuku bulan istikrazat-ı bahriyenin akçeleri resmen veya yalnız tarafeyn beyninde iki nüsha üzerine tanzim ve nüsha-i saniyeleri meclis-i ticaret kalemine veyahut ticaret kançilaryasına tarihlerinden nihayet on gün zarfında emaneten vaz‘ olunacak kontrato ile sübut bulacaktır. Saminen sigorta harç ve resimleri sigorta kumpanyaları tarafından verilecek ilmühaberler ile veyahut muntazam defterlerinden muhreç icmal pusulalarıyla tebyin edecektir. Tâsian sefine müstecirlerine verilmesi lazım gelen zarar ve ziyan tazminatı ticaret meclisinin ilamlarıyla veyahut tarafeyn davalarına mümeyyiz marifetiyle bakılmasına razı olmuşlar ise mümeyyizlerin kararnameleriyle tahakkuk edecektir.

Yedinci Madde: Salifü'z-zikr ashab-ı matlubun imtiyazları adi taahhüdatın feshini mucib olan esbab-ı umumiyeden maada sefinenin fasl-ı âtide beyan olunacak şerait üzere hükmen füruhtu veyahut sefine rızaen füruht olunup bayinin alacaklıları tarafından bir gûna muhalefet olunmayarak alanın ismine ve kâr ve zararına bahre sefer etmesi ile münfesih olur ancak ber-minval-i muharrer bu husus için kanunen mukarrer olan rüsum ve kaideye tevfikan bir alacaklı tarafından vuku bulacak muhalefetten yalnız ol muhalefeti icra eden kimesne faidemand olacaktır.

Sekizinci Madde: Bir sefine hareketinden otuz gün sonra başka başka iki limanlarda azimeti ile muvasalatı tasdik olunmuş ve ya diğer bir limana vasıl olmaksızın yine hareket ettiği limana avdetine değin altmış günden ziyade müddet mürur etmiş veyahut sefer-i baid için hareket edip