48

200 Madde Mebî‘ müşterinin ma‘lûmu olmak lâzımdır.

201 Madde Mebî‘in ma‘lûmiyeti sâirinden temyîz edecek hâl ve vasfını beyân ile hâsıl olur.
Meselâ şu kadar kile kızılca buğdayı yâhud falan ve falan hudûd ile mahdûd olan arsa deyu satılsa mebî‘ ma‘lûm ve bey‘ sahîh olur.

202 Madde Mebî‘ meclis-i bey‘de hâzır ise işâret-i hissiyye kâfîdir.
Meselâ bâyi‘ şu hayvânı sattım deyip müşterî dahi görerek kabûl edecek bey‘ sahîh olur.

203 Madde Mebî‘in müşterî ‘indinde ma‘lûm olması kâfî olup başka sûretle ta‘rîf ve tavsîfe hâcet yoktur.

204 Madde Mebî‘ ‘akdde ki ta‘yîn ile ta‘ayyün eder.
Meselâ bâyi‘ işâret-i hissiyye ile ta‘yîn ederek şu sâ‘ati sattım deyip müşterî dahi kabûl ettikte bâyi‘in ol sâ‘ati ‘aynen vermesi lâzım gelir.
Yoksa anı alıkoyup da yerine ol cinsden dîger bir sâ‘at veremez.

( Fasl-ı Sânî )

( Bey‘i câiz olup olmayan şeyler beyânındadır )

205 Madde Ma‘dûmun bey‘i bâtıldır.
Meselâ bir ağacın hîç belirmemiş olan meyvesini satmak bâtıldır.

206 Madde Kâmilen belirmiş olan meyveyi ekle sâlih olsun olmasın ağacı üzerinde iken satmak sahîhdir.

207 Madde Efrâdı mütelâhik olan ya‘nî birden zuhûr etmeyip de refte refte zuhûr edegelen meyve ve şükûfe ve yaprak ve sebzenin bir mikdârı belirmiş olduğu hâlde anlara teb‘an anlarla berâber henûz belirmemiş olanları dahi toptan satmak sahîh olur.

208 Madde Cinsi beyân olunmayarak satılan şey başka cinsden çıksa bey‘ bâtıl olur.
Meselâ bâyi‘ sırçayı elmâs deyu satsa bâtıldır.

209 Madde Teslîmi mümkin ve makdûr olmayan şeyi satmak bâtıldır.
Meselâ...