486

Birer rub'unu almak şıklarından birinin tercihinde muhayyer olacaklardır. Seyr ü seferin icrası sefinenin kıyam ve hareketinden sonra men olunmuş ise merkumun istihdam olundukları vakte isabet eden maaş ve ücretleri ve bundan başka tazmin olarak kendilerine fıkra-i sabıkada verilen miktarın iki katı ve geminin kıyam ve hareket ettiği mahalle avdet etmeleri içün diğer bir sefineye konuldukları halde icab eden masarif-i nakliyeleri tediye ve ifa kılınacaktır. Ancak zikr olunan ücret ve tazminatın miktarı hitam-ı seferde verilmesi meşrut olan akçeden hiç bir vakit ziyade olmayacaktır. Geriye izam olunan taifenin masarif-i nakliyesi her birinin sıfat ve haysiyetine göre tahsis ve ita olunacaktır.

Altmış sekizinci madde: Bidayet-i seferden evvel sefinenin gideceği mahal ile emr-i ticarete dair veyahut geminin icar olunup nakl edeceği emval ve emtianın memleketden ihracına mütedair devletçe memnuiyet vuku bulur veyahut devletin emriyle gemi tevkif olunur ise o hallerde izin ve ruhsat verilen gemi taifesinin zabitan ve neferatına yalnız geminin hizmetinde bulundukları günler için icab eden ücret-i yevmiyeleri verilecektir.

Altmış dokuzuncu madde: Emr-i ticaretin men'i veyahut geminin tevkifi hususları esna-yı seyr ü seferde vuku bulur ise men'i vukuunda sefine taifesinin zabitan ve neferatına istihdam olundukları günlerin ücretiyle mahallerine avdetleri masarifi ve tevkifi takdirinde mahiye ile tutulmuş olanlara geminin müddet-i tevkifi esnasında mahiyelerinin nısfı ve sefer-i tam üzere tutulmuş olanlara dahi müddet-i tevkif içün bir şey verilmeyip yalnız sefer-i tam içün meşrut olan hak ve ücretleri tediye olunacaktır.

Yetmişinci madde: Sefinenin seferi kasden tatvil ve tezyid olunduğu halde tezayüdüne göre sefer-i tam üzere istihdam olunan tavaifin ücretleri dahi tezayüd edecektir.

Yetmiş birinci madde: Sefine navlun mukavelesinde beyan olunan mahalden daha yakın