493

Çıkmasına muvakkaten mâni olur ise icar mukaveleleri bâki olup fakat seferin işbu teahhurundan dolayı zarar ve ziyan talebine kimsenin hakkı olmayacaktır. Kezalik öyle bir sebeb-i mücbir esnâ-yı seferde zuhur eder ise icar mukavelelerinin feshini ve bedel-i icarın dahi zamm olunmasını mucib olmayacaktır.

Toksan dokuzuncu madde — Geminin ber-vech-i bâlâ asbab-ı mücbireden nâşi tevkifi müddetinde muhammil emval ve emtiasını kendi masarifiyle gemiden çıkarmağa me’zun ve muhtar olup fakat gemi işbu tevkifden halâs oldukdan sonra tekrar tahmiline veyahud lâzım gelen icarenin itasına mecbur olacaktır.

Yüzüncü madde — Sefine ve takım ve aletleriyle navlun bedeli bir taraftan ve emtia-i mahmule diğer taraftan tarafeynin icra-yı mukaveleleri içün birbirlerine rehin makamındadır.

( Yedinci Fasıl )
( Senedât-ı tahmiliye hakkındadır )

Yüz birinci madde — Tahmiliye senedi bir şahs-ı mahsusun ismine veyahud anın emrine veyahud hamiline olarak bi’t-tanzim derununda tahmil olunan emtia ve eşyanın cins ve mikdarı ve nev’ ve çeşidlerinin beyanı ile beraber evvelen muhammilin isim ve şöhreti saniyen hamulenin irsal olunacağı ademin isim ve şöhretiyle mahall-i ikameti salisen kapudanın kezalik isim ve şöhret ve mahall-i ikameti rabian sefinenin ismi ve tonilato veyahud kil itibariyle mikdar-ı tahmili ve kangı devlet sancağı altında olduğu hamisen kıyam ve hareket edeceği mahal ile vasıl olacağı mahallin beyanı sadisen bedel-i navlunun mikdarı derc ve tahrir ve kenarında dahi nakl olunacak emtia ve eşyanın marka ve numaraları sebt ve tastir olunacaktır.

Yüz ikinci madde — Her bir tahmiliye senedi lâ-akal dört nüsha olarak tanzim olunup biri muhammile biri hamulenin irsal olunduğu ademe ve biri kapudana ve diğeri dahi geminin sahibine veyahud mutlaka teçhiz edene verilir. Sened-i mezkûrun işbu dört nüshası hamulenin tahmilinden nihayet yirmi dört saate kadar muhammil ile kapudan taraflarından imza olunmak lâzımdır kezalik