510

Yüz yetmiş birinci madde: İstikrâz-ı bahrî konturatosu bir sefer-i muayyen içün olub da ol sefere gidilmediği hâlde ikrâz iden kimesne temettü‘-i meşrûtını alamayıb yalnız virdüğü akçe ile fâiz-i kânûnisini imtiyâz vechile istirdâd idebilür. Fakat tehlike-i bahriye zamânı kendü hesâbı içün madde-i ânifede beyân olundığı üzere başlamış ise o hâlde mukâvele olunmuş olan temettü‘-i bahrînin istihsâline haklı olur.

Yüz yetmiş ikinci madde: Emti‘a üzerine istikrâz-ı bahrî iden kimesne geminin hamûlesi miyânında istikrâz itdiği meblağ kadar kendü mâlı oldığını isbât itmedikçe gemi ve hamûlesinin zâyi‘ olmasıyla borcundan halâs olmaz.

Yüz yetmiş üçüncü madde: İkrâz-ı bahrî iden kimesneler aksi bir mukâvele olunmuş olsa dahi vâki‘ olan hasârât-ı bahriye-i cesîmeden hissedâr olub anların hisse-i musîbeleri mikdârı müstakrizler dahi borçlarından halâs olur. Mukrizîn-i merkûmîn aksi bir mukâvele olmadığı hâlde âdi hasârât-ı bahriyeden dahi hissedâr olurlar. Mâ-zi’l-zikr hissedârlık ikrâz olunan re’sü’l-mâl ile meşrût olan temettü‘-i bahrînin mecmû‘ı üzerine hesâb olunacakdır.

Yüz yetmiş dördüncü madde: Bir sefîne veyâ bir hamûle üzerine hem istikrâz-ı bahrî ve hem de sigorta vâki‘ oldığı hâlde muahharan sefîne gark ve şikest olub da bundan ba‘zı şeyler kurtarılabilür ise kurtarılmış olan şeylerin semeni bâlâda beşinci maddede zikr ve beyân olunan imtiyâzlara halel gelmemek şartıyla mukrizin yalnız re’sü’l-mâlı ile sigortacının sigorta itdiği mikdâr meblağa göre beynlerinde garâmeten taksîm olunur.