524

Kabul veya hükm olunduğu halde eşya-yı metruke terki tarihinden itibaren sigortacıya aid ve raci‘ olacağını mesela sigortacı dahi kendisine terk olunmuş olan gemi ve emval ve eşya vuku-ı terkinden sonra gerü gelmiş olsa bile bunu özür ve bahane ederek sigorta olunan mebaliğin te’diyesinden halas olamayacaktır.

İki yüz otuzuncu madde: Kurtarılmış olan emval ve eşyanın navlu ber-vech-i peşin te’diye olunmuş olsa bile gemi terk olunmasiyle o dahi terk olunmuş ve sigortacının malı olmuş olur ise de bundan istikraz-ı bahri etmiş olanların hukukuna ve esna-yı seferde taife-i sefinenin ücret ve maaşlarına ve masarif-i vakıanın ifasına halel gelmez.

İki yüz otuz birinci madde: Sefine bir devlet tarafından zabt ve tevkif olunduğu halde bunun haberini aldıktan üç gün zarfında sigorta ettiren kimse sigortacıya keyfiyeti tebliğ ettirmekle mecburdur. Fakat eşya-yı mazbuta Avrupa denizlerinde veya Bahr-i Sefid’de ve Bahr-i Baltık’da zabt ve tevkif olunmuş ise altı mah ve zabt ve tevkifleri bunlardan baîd mahallerde vuku bulmuş ise bir sene müddet mürurunda sigortacıya terk olunabilecektir. İşbu müddetler dahi zabt ve tevkifin tebliği tarihinden bed’ ve itibar olunacaktır. Eğer eşya-yı mazbuta bozulur ve telef olur makulesinden ise zikrolunan müddetler şıkk-ı evvelde bir buçuk aya ve şıkk-ı sanide üç maha tenzil olunacaktır.

İki yüz otuz ikinci madde: Madde-i ânifede tayin ve tahsis olunan müddetler zarfında sigorta ettiren kimseler eşya-yı mazbutanın istihlası zımnında ellerinden geldiği mertebe her vechile sarf-ı gayret etmeye mecbur oldukları misillü sigortacılar dahi kendi taraflarından gerek yalnızca ve gerek sigorta ettirenlerin ittifakiyle eşya tahlisi için her türlü harekat-ı icabiyenin icrasına me’zundurlar.

İki yüz otuz üçüncü madde: Gemi karaya oturup da yüzdürülerek ve tamir olunarak gitmesi meşrut olan mahalle varabilecek hale getirilebildiği surette masarif-i tamiriyesi sigorta olunduğu meblağın üç rub‘unu tecavüz etmedikçe sefere kabil değildir deyu gemi sigortacıya terk olunamaz fakat ol vechile