537

( Ceza Kanunname-i Hümayunudur )
( Suret-i Hatt-ı Hümayun )
( Mucibince amel oluna )

( Mukaddime )
( Birinci Fasıl )
( Ale’l-umum cürüm ve cezaların meratib ve derecatıyla bazı )
( usul-i umumiye beyanındadır )

Birinci Madde Doğrudan doğruya hükümet aleyhine vuku bulan ceraimin icray-ı mücazatı devlete aid olduğu gibi bir şahs aleyhine vuku bulan ceraimin asayiş-i umumiyi ihlal eylemesi ciheti dahi kezalik devlete aid olduğundan tayin ve icrası şer’an emr-i ülü’l-emre aid olan ta’zirin tayin-i derecatını dahi işbu kanunname mütekeffil ve mütezammın olup ancak her halde şer’an muayyen olan hukuk-ı şahsiyeye halel gelmeyecekdir.

İkinci Madde Kanunen mücazat olunan ceraim üç nev’dir birincisi cinayet ikincisi cünha üçüncüsü kabahatdir.

Üçüncü Madde Cinayet mücazat-ı terhibiyeyi istilzam eden ef’aldir mücazat-ı terhibiye katl ve maa’t-teşhir müebbeden ya muvakkaten küreğe konmak ve kalebend olmak maddeleriyle nefy-i ebed ve müebbeden rütbe ve memuriyetden mahrumiyet ve hukuk-ı medeniyeden iskat maddeleridir.

Dördüncü Madde Cünha mücazat-ı te’dibiyeyi müstelzim olan ef’aldir mücazat-ı te’dibiye bir haftadan ziyade habs ve muvakkaten nefy ve memuriyetden tard ve cezay-ı nakdi maddeleridir.

Beşinci Madde Kabahat muamele-i tekdiriyeyi istilzam eden ef’al ve harekatdır muamele-i tekdiriye yirmi dört saatden bir haftaya kadar habs ve nihayet yüz guruşa kadar mücazat-ı nakdiyedir.

Altıncı Madde Kanunun tayin eylediği yerlerde işbu cezalar bazen yalnız ve bazen beraber olarak hükm ve icra olunur.