54

Kaldırmak üzere mevzû' olan şeyler ve bağ ve bağçe bey'inde limon ve çiçek saksıları ve âhar mahalle nakl olunmak üzere dikilmiş olan fidanlar ve arâzî bey'inde ekin ve eşcârın bey'inde meyve pazarlıkda zikr ve şart olunmadıkça mebî' ile berâber satılmış olmazlar.
Fakat birlikde satılması örf ve âdet olan yerlerde binek atının gemi ve yük bârgirinin yuları min-gayri zikr bey'e dâhil olur.

٢٣٤ Madde Teba'an bey'e dâhil olan şey'in semeninden hissesi yokdur.
Meselâ yük bârgirinin kable'l-kabz yuları sirkat olunsa semen-i müsemmâdan bir şey tenzîl etmek lâzım gelmez.

٢٣٥ Madde Hîn-i bey'de ilâve olunan ba'zı elfâz-ı umûmiyenin şâmil olduğu şeyler bey'e dâhil olur.
Meselâ bâyi' şu hâneyi cemî' hukûkıyle satdum dese ol hânenin hakk-ı mürûru ve hakk-ı şürbü ve hakk-ı mesîli bey'e dâhil olur.

٢٣٦ Madde Ba'de'l-akd ve kable'l-kabz mebî'de hâsıl olan semere ve ziyâde müşteriye âid olur.
Meselâ bir bağçe satıldıkda kable'l-kabz hâsıl olan meyve ve sebze müşteriye âid olur.
Kezâlik satılmış olan ineğin kable'l-kabz tevellüd eden yavrusu müşterinin malıdır.

( Bâb-ı Sâlis )
( Semene müte'allik mesâil beyânında olub iki faslı hâvîdir )
( Fasl-ı Evvel )
( Semenin evsâf ve ahvâline müterettib olan mevâd beyânındadır )

٢٣٧ Madde Hîn-i bey'de tesmiye-i semen lâzımdır.
Binâen aleyh mebî'in bahâsı zikr olunmaz ise bey' fâsid olur.

٢٣٨ Madde Semenin ma'lûm olması lâzımdır.

٢٣٩ Madde Semenin ma'lûmiyeti meydanda ise müşâhede ile değil ise mikdâr ve vasfını beyân ile hâsıl olur.