549

Müstahkemin veyahud bir liman veya bir şehrin kumandasını alır ise ve her kim me’mur olduğu asker kumandasını terk etmesiçün taraf-ı Devlet-i Aliyye’den vaki olan emre imtisal etmez ise ve her bir kumandan maiyetinde olan askere izin verilerek dağılması hakkında vaki olan evamir-i Devlet-i Aliyye’ye kezalik sebeb-i makbul olmadıkça imtisal etmeyerek başında tutar ise idam olunur.

Altmışıncı Madde
Devlet-i Aliyye’nin asâkir-i muvazzafa ve zabtiyesini i’mal ve istihdama me’mur olanlardan her kim olur ise olsun işbu askerin saltanat-ı seniyye emriyle icra olunan ahz-ı neferat-ı askeriye maddesi aleyhine hareket eylemelerini taleb veyahud emr eder ise nefy-i ebed cezasıyla ve eğer evamir ve talebin âsâr-ı fi’liyesi görülür yani me’mur olan kuvve-i askeriyenin böyle emr-i nâ-marzîye mutavaatiyle Devlet-i Aliyye’nin ol hususda olan matlabının icrasına fi’len mumanat olunur ise âmir olan kimse idam ile mücazat olunur ve böyle hilaf-ı marzî emre mutavaat edenlerin zabit ve serkerdeleri dahi muvakkaten kürek cezasıyla mücazat kılınur.

Altmış Birinci Madde
Her kim Devlet-i Aliyye’ye müteallik olan ebniye ve her nev’ mühimmat anbar ve mahzenlerini an kasd yani hıyanet ihrak ve hedm eder ise idam olunur.

Altmış İkinci Madde
Her kim Devlet-i Aliyye’nin emlak ve emval ve nükudunu veya ahaliden bir cem-i gafirin emlakini zabt ve yağma ve garet etmek ve bu misillü cinayat ashabının aleyhinde hareket eden asâkir-i Devlet-i Aliyye’ye karşı durmak zımnında teşekkül etmiş olan müsellah eşkıya cemiyetine baş olur veyahud bu cemiyet içinde bir kumanda sahibi bulunur ise idam olunur ve bu makule eşkıya cemiyetlerinde dâhil bulunanlardan ol cemiyetlerde söz ve kumanda sahibi olmayanlar mahall-i fesadda tutuldukları halde muvakkaten küreğe konulur.

(Fî 3 Cemaziyelahir sene 1277 Zeyl)
(Dağlarda ve kırlarda müsellah oldukları halde gezerek rast geldikleri yolcuları tutup soymak fazihasını irtikab eden eşhas ki kutta’