554

İstenilür ve o dahi gelür haber verir ve isbat eyler ise maslahatı ber-vech-i hakkaniyet görülmekden başka kendüsünden istenilmiş olan akçe ta elinden ahz ile nısfı mükâfat kendüsüne ita olunur ve rüşveti talib olan hakkında mürteşi mücazatı icra olunur.

Yetmiş Dokuzuncu Madde
Her ne husus içün olursa olsun kendüsine rüşvet arz olunan kimse ol rüşveti red ile almazdan mukaddem ve gerek aldıktan sonra ahar tarafından duyulmazdan nihayet iki ay zarfında Dersaadet'de makam-ı vekâlet-i kübraya ve taşralarda ise bulundığı mahallin büyük me'murine ve meclisine haber verir ve akçeyi aldığı suretde teslim eder ise hakkında muamele-i tahsiniye icra olunur ve eğer akçe henüz alınmamış ise cezayı nakdi olmak üzere ol mikdar akçe raşiden ahz olundukdan sonra hakkında balada beyan olundığı veçhile raşi hakkında muayyen olan diğer cezalar dahi icra kılınur.

Sekseninci Madde
Varidat-ı devletin ahalisi hizmetinde bulunan her kim olur ise olsun varidat-ı devleti ahz ve talebi var iken birinden akçe alarak veyahud menfaat-i zatiyesine bakarak dun baha ile ihale eder ise bunı irtikâb eden me'mur emval-i devlet sâriki hükmünde olarak ber-vech-i âti dördüncü fasılda seksen ikinci maddede muayyen olan sirkat cezalarıyla mücazat olunur.

Seksen Birinci Madde
Bir kimse diğer kimseye bir cinayeti işlemek içün rüşvet verir ise ve ol cinayet balada zikr olunan rüşvet cezalarından daha ağır bir cezayı icab eden cinayetlerden olur ise ibtida mürteşi yani akçeyi alup ol cinayeti işleyenden yalnız teati olunmuş olan akçe alındıktan sonra kendüsi ve gerek raşi yani akçeyi verüp ve ol cinayeti işletmiş olan kimse ve bunlar arasında vasıta var ise işbu ceza kanunname-i hümayununda ol cinayeti işleyen ve işleten ve vasıta olanlar haklarında muayyen olan cezalar ile mücazat olunurlar.

( Dördüncü Fasıl )
( Sirkat Emval-i Miriye ve İrtikâbat-ı Saire )

Seksen İkinci Madde
Her kim emval ve eşya-yı miriyeyi nakden ve aynen sirkat eder