558

Ve iltiması iden kimseden on Mecidiye altınından elli Mecidiye altınuna kadar mücazat-ı nakdiye alınur.

Toksan altıncı madde: Bu makule deaviye vuku bulan müdahale üzerine ol dâva bi-gayr-i hakk hükm olunmuş ise bu hükmü emr ile itdirmiş olan memur memuriyetinden tard olundukdan sonra üç aydan bir buçuk yıla kadar habs yahud altı aydan üç yıla kadar nefy ile mücazat olunur. Ve eğer bu hükm iltimas ve rica üzerine vuku bulmuş ise o makule rica ve iltimas iden kimseden ancak mücazat-ı nakdiyeden başka bir buçuk aydan üç aya kadar habs yahud üç aydan altı aya kadar nefy olunur.

Toksan yedinci madde: Bir dâvada vuku bulan emr ve iltimas ve ricayı mehakim ve mecalisden biri devlete beyan ve ihbar eylemez ise velev ol emr ve iltimas ve ricayı icra etmemiş olsa bile hâkim ya reis bulunan kimse memuriyetden tard ile mücazat olunur.

Toksan sekizinci madde: Eğer bu makule vuku bulan emr ve iltimas ve ricayı mehakim ve mecalisden biri devlete ihbar etmedikden başka ol emr ve iltimas ve ricaya mebni hilaf-ı hakkaniyet hükm eylemiş ise gerek hâkim ve gerek meclis reisi altı sene müddetle tard ve üç sene müddetle nefy cezalarıyla ve meclis azası yalnız altı sene müddetle tard cezasıyla mücazat olunurlar ve gerek hâkim ve reisin ve gerek azanın hiç bir vakitde mehakim ve meclis memuriyetlerinde istihdamları caiz olamaz.

Toksan dokuzuncu madde: Büyük ve küçük memurinden her kim olur ise olsun evamir-i devlet ve ahkam-ı kavanin ve nizamatın icrasına ve her nevi emval-i mürettebenin tahsiline muhalefet içün sarf-ı nüfuz ve kuvve-i müessire edecek ve ettirecek olur ise muvakkaten habs cezasıyla mücazat olunur. Ve eğer memurların bu vechle hareketi amirlerinin emriyle zaruri ve mecburi vuku bulmuş ise bu ceza bu makulelerin hakkında cari olmayıp ibtida emr kimden zuhur etmiş ise anın hakkında icra kılınur ve eğer bu misillü bir hareket daha ağır bir cinayeti müeddi olur ise o ağır cinayetin cezası hükm ve icra olunur.