562

Olunup her biri derece-i töhmetine göre altı aydan üç seneye kadar nefy ile mücazat olunur.

Yüz on birinci madde: Büyük ve küçük kâffe-i memurîn ve memur adamları ve maslahat ve ihzar mübaşirleri ve zabtiye ve asâkir-i muvazzafa neferatı ve zabitanı gelip geçtikleri yerlerde ahalinin hanelerine konup cebren ve meccanen yem ve yiyecek alırlar ise aldıkları her ne ise semeni ashabına red ettirildikten ve kendileri memuriyet ve hizmetlerinden tard olunduktan sonra bir haftadan bir aya kadar habs ile te’dib ve asâkir-i muvazzafanın heyetçe hareketlerinde bu misillü şeylere cesaret ederler ise aldıkları eşyanın esmanı zabitanından ahz ile sahiplerine teslim ettirildikten sonra hizmetlerinden dahi çıkarılıp altı aydan üç seneye kadar habs ile mücazat olunur.

( Yedinci Fasıl )

( Memurîn-i Devlet-i Aliyyeye muhalefet ve adem-i itaat ve hakaret )
( Edenlerin cezası )

Yüz on ikinci madde: Mehakim ve mecalis memurlarına ve sair memurîn-i Devlet-i Aliyyeye memuriyetlerini icrada iken veyahut icra ettikleri hükm-i memuriyetten dolayı bunların kadr [ü] namuslarına nakîsa verecek suretle muamele-i hakarete ve ıtale-i lisana ve ihafeye cüret eyleyenler olur ise bir haftadan altı aya kadar habs olunur. Ve bu hakaret ve ıtale-i lisan ve ihafe keyfiyetleri mehakim ve mecalisin murafaası vaktinde vuku bulur ise buna tecasür olan kimse altı aydan bir yıla kadar habs olunur.

Yüz on üçüncü madde: Asâkir-i nizamiyenin ve hükümet tarafından alel-itlak zabtiyeye ve idareye memur bulunanların memuriyetlerini icrada veyahut icra ettikleri hükm-i memuriyetten dolayı kadr [ü] namuslarına nakîsa verecek suretle haklarında muamele-i hakarete ve ıtale-i lisana ve ihafeye cüret edenler olur ise bir Mecidiye altınından üç Mecidiye altınına kadar ceza-yı nakdî ahz olunur. Ve bu misillü hakaretler asâkir-i nizamiye zabitanı ve zabtiye serkerdeleri haklarında vuku bulur ise bir haftadan bir aya kadar habs olunur ve eğer bu misillü hakaret…