564

Yüz on sekizinci madde: Haps ve tevkif olunan eşhasın muhafazasına memur olmayan kimselerden bir adam mahbusunun firarı esbabını tahsil ve teshil eder ise bir haftadan altı aya kadar hapis ile mücazat olunur.

Yüz on dokuzuncu madde: Gerek mahbusinin muhafazasına memur olan ve gerek sair kimselerden bir adam mahbusinin zor ile firarları esbabını tahsil içün bunlara âlât ve edevât ve esliha i’tâ eder ise muvakkaten kürek cezasiyle mücazat olunur.

Yüz yirminci madde: Mahbusinin muhafazasına memur olanlardan bir kimse akçe alarak bir mahbus kaçırdığı suretde eğer mahbusun cürmü katl ve müebbed kürek ya kal’a-bendlik cezalarından birini mucib olan cinayâtdan ise aldığı akçenin iki katı cezây-ı nakdî alındıktan başka muvakkaten kürek cezasiyle mücazat olunur. Ve eğer mahbusun cürmü bunların mâ-dûnunda bir cürüm ise mürteşî hakkında muayyen olan cezâ ile mücazat olunur.

Yüz yirmi birinci madde: Mahbesden firar edeni veyahut bir cinayet ile müttehem olanı bir kimse bilerek hanesinde ketm ve ihfa eder ise altı aydan iki seneye kadar hapis olunur. Ve usûl ve fürû‘dan olan akraba ve ezvâc ve birader ve hemşiresi işbu mücazatdan bi’l-istisnâ muaf olurlar.

( Dokuzuncu Fasl )

( Mühür fekkine ve emanet eşya ve evrak-ı resmiyenin ahzine mütecasir )
( olanların mücazatı )

Yüz yirmi ikinci madde: Devlet idaresinin veyahut mehâkimin emriyle her ne maslahata dair olur ise olsun bir mahal veyahut eşya ve evrakın hıfzı içün vaz‘ olunan mühür bozulup açıldığı halde ol mührün muhafaza memuru var ise ve bu keyfiyet anın gaflet ve tesebbübüyle vuku‘a gelmiş ise beş mecidiye altınından elli mecidiye altınınına kadar cezây-ı nakdî alınır. Ve bu mühür cinayâta dair evrak ve eşya üzerinde bulunup da fekk olunmuş ise bu cezây-ı nakdîden başka ol evrak ve eşyanın müteallik olduğu cinayetin derecesine göre muhafazasına memur olan adem üç aydan bir seneye kadar hapis ile mücazat olunur.

Yüz yirmi