568

Matbaalarda saltanat-ı seniye ve erbab-ı hükümet ve tebaa-i saltanat-ı seniyeden olan bir millet aleyhinde gazete veyahut kitap ve evrak-ı muzırra tab ve neşrine mütecasir olan kimsenin ibtida bastırmış olduğu şeylerin zaptıyla derece-i cürmüne göre matbaası muvakkaten veyahut bütün bütün kapatıldıktan sonra on Mecidiye altınından elli Mecidiye altınına kadar cezay-ı nakdi ahz olunur.

Yüz otuz dokuzuncu madde: Âdab-ı umumiyeye muhalif olarak nazmen ve nesren hezl ve hecve dair şeyleri veyahut edepsizce resim ve tasviri basan ve bastıran ve neşr eden kimseden bir Mecidiye altınından beş Mecidiye altınına kadar mücazat-ı nakdiye alınır ve yirmi dört saatten bir haftaya kadar haps olunur.

Yüz kırkıncı madde: Maarif-i umumiye nizamatının hilafına olarak bir kimse mektep açar ise açtığı mektep kapatıldıktan sonra beş Mecidiye altınından otuz Mecidiye altınına kadar cezay-ı nakdi alınır.

Yüz kırk birinci madde: Maarif-i umumiye nizamatının hilafına olarak bila-ruhsat muallimlik eden olur ise muallimlikten men ile iki Mecidiye altınından on Mecidiye altınına kadar cezay-ı nakdi alınır.

Yüz kırk ikinci madde: Maarif-i umumiye nizamatının hilafına olarak bir mektepte bir kitap tedris olunur ise ol kitabı okutturan mektep müdürü ve eğer mektebin müdürü yoğise ol kitabı okutan muallim bir haftadan bir seneye kadar hapis ile mücazat olunur.

( On dördüncü fasıl )
( Kalpazanlık beyanındadır )

Yüz kırk üçüncü madde: Devlet-i Aliyye’de tedavülü nizamen makbul ve mukarrer olan altın ve gümüş meskûkatına takliden meskûkat kat eden ve zikr olunan meskûkat-ı mukarrereden eğe ve zımba ve tîzâb ve ya sair alat ve tarik ile az çok altın ve gümüş ihrac ve ifraz ederek kıymetlerini tenkis eyleyen ve bir sikkeyi daha kıymetli olan ahar bir sikke yerine sürmek üzere anın rengine yaldızlayan ve o misillü kalp ve züyuf meskûkatın memalik-i mahrusada tedavülüne veyahut

Bilad