581

Hatun ile zina fi'l-i kabihine me’luf olan ve zevcesinin şikâyet-i vakıası üzerine fi'l-i mezkûru irtikâbı tahakkuk eden zevc beş Mecidiye altınından yüz Mecidiye altınına kadar cezay-ı nakdî ahzıyla mücazat olunur)

İki yüz ikinci madde — Mugayir-i ar ve hayâ alenen fi'l-i şenî icrasına ictisar eden şahıs üç aydan bir seneye kadar hapsolunur ve bir Mecidiye altınından on Mecidiye altınına kadar cezay-ı nakdî alınır.

(Fi 3 Cemaziyelahir sene 1277 Zeyl)
(Zükûr ve inasdan genç kimselere harf-endazlık edenler bir haftadan bir aya kadar ve elleriyle sarkıntılık eyleyenler bir aydan üç aya kadar hapsolunur. Nisa kıyafetiyle makarr-ı nisvan olan mahallere girenler mücerred bu fiilden dolayı üç aydan bir seneye kadar hapsolunurlar ve böyle tebdil-i hey'etle girmiş oldukları kanunen işbu cezadan eşedd bir cezayı mucib olan bir cinayet veyahud cünhaya ibtidar etmiş ise ol fi'lin cezasıyla cezalanırlar)

(Dördüncü Fasıl)
(Hilaf-ı usul hapis ve tevkif-i eşhas ve sabi ve mürahik sirkatı)
(Ve kız kaçırmak fazahatı)

İki yüz üçüncü madde — Her kim olur ise olsun memurîn-i hükümetin emri olmaksızın ashab-ı töhmetin tevkifi hakkında kavanin ve nizamatın tayin etmiş olduğu usulün haricinde olarak bir şahsı haps ve tevkif eyler veyahud rehin suretiyle saklar ise altı mahdan üç seneye kadar hapis ile mücazat olunur. Bu suretle haps ve tevkif olunan veyahud rehin suretiyle saklanılan eşhası ihfa için bilerek yer gösteren kimse dahi kezalik üç mahdan üç seneye kadar hapsolunur.

İki yüz dördüncü madde — Madde-i sabıkada mezkûr olan tevkif-i eşhas cürmünü bir kimse devlet memuru zey ve kıyafetine girerek veyahud sahte isim söyleyerek veyahud memurîn tarafından sahte emir göstererek icraya cesaret eyler ise hakkında muvakkat kürek cezası icra olunur. Kezalik