583

Kâzibesiyle muvakkat kürek mücazatından eşedd bir ceza görmüş ise şahid-i zur hakkında dahi aynile bu ceza icra olunur.

İkiyüz sekizinci madde
Cünha ve kabahate müteallik mevad ile müttehem olanların gerek lehinde ve gerek aleyhinde kezalik yalan şahidliği eden şahıs bir aydan beş aya kadar hapis olunur.

İkiyüz dokuzuncu madde
Deavi-i adiyede yalan şahidliğini irtikâb eden şahıs altı aydan bir seneye kadar hapis olunur.

İkiyüz onuncu madde
Yalan şahidliğini irtikâb eden şahıs bunun zımnında para almış ise taati olunan akçenin bir misli dahi istifa olunarak alan ve veren haklarında mürteşi ve raşi cezaları icra olunur.

İkiyüz on birinci madde
Şehadet-i sahiha ve müstakime ashabını ifay-ı şehadetten kerhen men eden veyahud cebren yalan şehadeti ettiren kimse hakkında yalan şahidlerinin derece-i töhmetine göre terettüb eden cezay-ı kanuni icra olunur.

İkiyüz on ikinci madde
Hukukça davalarda yemin düşüp de yalan yere yemin eden kimse ba'de't-teşhir altı aydan aşağı olmamak üzere hapis cezasiyle mücazat olunur.

( Altıncı Fasıl )

( İftira ve Şetm ve İfşay-ı Sır Beyanındadır )

İkiyüz on üçüncü madde
Bir adamın sarihan mürtekib olmuş olması lazım gelse mücazat-ı kanuniyeyi davet edecek cürümü ve halkın nefretini mucib olacak şeyleri diğer bir şahıs kendisine bir cemiyetde lisanen veyahud el yazısı veyahud basma kağıd ta'lik ve neşriyle isnad eder ve memurin-i devlet hakkında lı-garazin müfteriyata tasaddi eder ve şahs-ı merkumun bu isnadatı iftira olduğu tebeyyün eyler ise azv olunan maddenin faili hakkında kanunen terettüb edecek ceza aynile müfteri hakkında icra olunur fakat kanunen ve nizamen hükümete ihbar-ı vukuat etmek veyahud davay-ı hukuk eylemek bu kaideden müstesnadır.

İkiyüz on dördüncü madde
Bir madde-i mahsusa isnadı olmayıp sadece...