584

Maayibden bir şey tahsisiyle ya diğer suretle bir kimesne diğer kimesne hakkında muhill-i namus söz söyler veyahud şetm eyler ise yirmi dört saatden bir aya kadar habs olunur veyahud bu kabilden yarım Mecidiye altınından üç Mecidiye altınuna kadar cezay-ı nakdî alınur.

İkiyüz on beşinci madde: Etibba ve cerrah ve eczacı ve kabile hatunlar ve bunların emsali kimesneler san'atları iktizasınca kendülerine tevdi kılınmış olan serair-i şahsiyeyi kanunen ihbara mecbur oldukları ahvalden gayrıda ifşa ederler ise yirmi dört saatden bir haftaya kadar habs ile bir yirmilik Mecidiyeden bir Mecidiye altınuna kadar cezay-ı nakdî alınur.

( Yedinci Fasıl )
( Sirkat hakkında dır )

İkiyüz on altıncı madde: Zevc ve zevce birlikde oldukları veya birbirlerinden mufarakat eyledikleri halde yekdiğerine aid olan malı ve evlad ve sair fürûun baba ve ana ve sair usulden olan akrabanın malını ve baba ve ana ve sair usulden olan akraba evlad ve sair fürûun malını ahz ederler ise me’huzat-ı vakıa istirdad olunarak sahibine verilir ve mal-ı me’huz sarf ve istihlak olunup ahiz dahi tazminine muktedir olmadığı ve kendüsü madde-i sirkati itiyad etmiş bulunduğu halde habs cezasiyle mücazat olunur ve bu yolda ahz olunan eşyaye haricden yataklık eden veyahud bunun cümlesini veya bir mikdarını kendü menfaatleri içün istimal eyleyen eşhas adeta sarık gibi mücazat olunur.

İkiyüz on yedinci madde: Zirde muharrer beş halin cümlesi beraber olarak icra olunan sirkatin cezası müebbeden kürekdir işbu ahval-i hamsenin birincisi gece vakti olmakdır ikincisi iki veyahud daha ziyade eşhas birlikde bulunmakdır üçüncüsü bunlar veyahud içlerinden velev birisi hafî ya celî müsellah olmakdır dördüncüsü bir hane veyahud müştemilatına veya bir odasına ve’l-hasıl içinde adam oturur her nevi mahalle divarını yıkarak veya divarından nerdüban ile aşarak veyahud kapusını kırarak veya bir alet ile kilidini açarak