588

Esbabı teshil eder ise bu makuleler yalnız sirkat cezasından afv olunurlar fakat bir seneyi tecavüz etmemek üzere zabtiye nezareti altında bulunurlar )

İrade-i Seniyye tarihi fi 3 Rebiülahir sene 85
( Ve fi 12 Temmuz sene 1284 zeyl )

( Mal-ı mesruku bilerek alanlar fiil ve hareketlerinin derecesine göre yirmi dört saatden bir seneye kadar hapis cezasiyle mücazat olunur ve sirkat olunan şey mevcud ise sahibine red değil ise tazmin ettirilir )

( Sekizinci Fasıl )

( İflas ve dolandırıcılık ile müttehem olanların cezası )

İki yüz otuz birinci madde — Ticaret Kanunnamesinde ahvali muharrer olduğu üzere hileli müflis olanlar ve Kanun-ı Ticaret hükmünce bunlara şerik töhmet oldukları tebeyyün edenler muvakkat kürek cezasiyle mücazat olunurlar.

İki yüz otuz ikinci madde — Âdi iflas ile müttehem olanlar yani teseyyüb ile iflasa çıkanlar bir aydan iki seneye kadar hapis olunurlar.

İki yüz otuz üçüncü madde — Dolandırıcılık yolunda türlü hile ve desais imaliyle bir adamın akçe ya emlak veya tahvilat ve senedatını ve sair eşyasını bir takrib ile elinden alan şahs üç aydan üç seneye kadar hapis olunur ve kendüsünden bir Mecidiye altınından elli Mecidiye altınına kadar cezay-ı nakdi dahi alınır ve memurin-i devletden ise bu cezalardan başka memuriyetden tard cezasına dahi müstahak olur.

( Dokuzuncu Fasıl )
( Emniyetin suiistimali )

İki yüz otuz dördüncü madde — Her kim bir sabi-i mümeyyizin ihtiyacat ve za’f ve hevasını suiistimal ile zararına olarak akçe ikrazına ve eşya iaresine veyahut ticaret ve sair gûne evrakın itasına dair taahhüd veya ibrayı mutazammın...