289

Elinden hîle ile her nasıl yapılmış olur ise olsun bir sened alır ise
iki aydan iki seneye kadar haps olunur ve vukū‘bulan zararı tazmîn
etdirildikden başka tazmîn olunan akçenin rub‘undan ziyâde ve her hâlde bir Mecidiye
altınından aşağı olmamak üzere cezâ-yı nakdî alınır. Ve eğer bu senedi alan
kimse ol sabî-i mümeyyizin velî yâ vasîsi ise haps müddeti üç aydan üç seneye
kadar temdîd olunur.

İkiyüz otuz beşinci madde: Bir şahs kendisine emniyet tevdî‘ ve teslîm olunan
mühürlü veyâ imzâlı beyâz kâğıdı sû-i isti‘mâl ile hîle ve sirkat
sûretinde o misillü mühürlü yâ imzâlı kâğıdın üst tarafına bir taahhüdü
veyâ bir ibrâyı mutazammin olan ibârât ile doldurur veyâ sâhib-i mühür ve imzâyı
zâten ithâm ve mâlen ıdrâr edecek bir sened tanzîm eder ise altı aydan aşağı
olmamak üzere haps ile mücâzât olunur ve beş Mecidiye altınından elli Mecidiye
altınına kadar cezâ-yı nakdî alınır. Ve eğer o misillü mühürlü ve imzâlı kâğıd
kendisine emniyet tevdî‘ ve teslîm olunmayub bir takrîb ile ele getirerek öyle
sâhte şeyler yazmış ise sâhtekâr hükmünde tutularak sâhtekâr cezâsıyla
te'dîb olunur.

İkiyüz otuz altıncı madde: Emânet ve vekâlet tarîkıyla veyâhud ibrâz ve iâde
etmek veyâhud muayyen olan bir sûret ile isti‘mâl eylemek üzere ücretli
ve ücretsiz bir hizmet sıfatıyla kendisine i‘tâ ve teslîm kılınmış olan emvâl
ve eşyâ ve nukûd ve tahvîlât ve sâir her türlü taahhüdât ve ibrâyı mutazammin senedât
ve sâireyi ashâbını ıdrâran ketm veyâhud zâyi‘ eden şahs iki aydan
iki seneye kadar haps olunur ve kendisinden lâzım gelecek tazmînâtın îfâsıyla
bedel-i tazmînin rub‘u kadar cezâ-yı nakdî dahi alınır ve eğer bu cürmü muvazzaf
hizmetkâr ve çırak ve yazıcı ve amele takımından biri kendi âmiri veyâ üstâdını
ıdrâran irtikâb eyler ise tazmîn-i zarar etdirildikden sonra bir seneden aşağı
olmamak üzere haps edilir.

İkiyüz otuz yedinci madde: Bir da‘vânın esnâ-yı cereyân ve muhâkemesinde bir sened
veyâ bir kâğıdı mahkemeye ibrâz ve teslîm etdikden sonra her ne sûretle olur ise