597

( Cinâyet da^vâlarında şâhid ve muhbir masârifinin sûret-i tesviyesine dâir )

( Fıkarât-ı nizâmiye-i muvakkatedir )

Birinci mâdde muhâkemât-ı cezâiyede ikmâl-i tahkîkât içün hükûmet ma^rifetiyle ihzâr kılınan şâhid ve muhbirin masârif-i seferiye ve zarûriyesi mahallî mâl sandığından ta^vîzan i^tâ olunur

İkinci mâdde birinci mâddede muharrer masârif muhâkemeyi icrâ eden meclis-i temyîz tarafından takdîr ve ta^yîn olunur celb olunan şâhid ve muhbirin masârif-i seferiyesi bârgîr veyâ timuryolu veyâ vapur ücreti ve ücret-i yevmiyesi dahi masârif-i zarûriye-i şahsiyesi nisbetini tecâvüz edemez

Üçüncü mâdde şâhid ve muhbirin bidâyet-i maslahatda mâl sandığından tesviye olunan masârif-i seferiye ve zarûriyesi netîce-i muhâkemede haksız çıkan tarafdan tazmîn etdirilür

Dördüncü mâdde indelmürâfa^a diyete münkalib olan bir fi^l-i katlin mütecâsiri kânûnen i^dâm olunur ise anın esnây-ı muhâkemesinde celb olunan şâhid ve muhbirlerin masârif-i seferiye ve zarûriyesi kâmilen taraf-ı devletden i^tâ kılınur

Beşinci mâdde şâhid ve muhbirin îcâb-ı tabî^isinden ziyâde tevkîfine sebeb olan müstantık ve sâir me^mûrlardan cezâ kânûnnâmesinin yüz ikinci mâddesine tevfîkan bir aylıkları mikdârı cezây-ı nakdî alınur

Hâtime mevâdd-ı sâlife usûl-i muhâkeme-i cezâiye nizâmnâmesinin neşrine kadar mer^iyyü’l-icrâ olacakdır

Fî 4 Rebî^ülevvel sene 1286