606

Olunan cezayı sarahaten kendisine beyan etmek lazımdır ve ol madde-i kanuniye
hükm mazbatasına aynile derc olunacaktır.
Sekizinci madde — Bir memur hakkında azv olunan töhmetin bi-esas olup da iftira
olduğu inde’t-tahkik anlaşılır ise ol memurun tabi olduğu nezaret
veya idare tarafından iftira davasını mutazammın bir takrir yapılır ve müfterinin muhakemesi
dahi mevad-ı sabıkada beyan olunan usul ve derecata tevfikan icra olunur.

Dokuzuncu madde — Memurin ve hademeden kaza meclisinde muhakemeleri görülüp
cezaları kaza meclisinde hükm ve icra kılınanların liva idare meclislerine ve liva
meclislerinde muhakemeleri görülüp cezaları hükm ve icra kılınanların vilayet
idare meclislerine istinaf etmeğe hakları olacağı gibi merkez-i vilayet
idare meclisinde ve altıncı maddede muharrer olduğu üzere İstanbul Vilayeti İdare
Meclisinde ikmal-i muhakemeleriyle cezaları hükm ve icra kılınan müttehemlerin dahi Şura-yı
Devlet’de tetkik-i muhakemeleri içün usul-i mahsusası üzere Bab-ı Ali’ye
istinafa selahiyetleri vardır bu makule istinaf iddiasında bulunanların istinafa
rü’yet-i davalarıyçün memur göndermek veya adam celb olunmak misillü masarif
vukubulur ise haksız çıkan taraftan tediye ettirilir.

Fi 3 Rebiülevvel sene 1288