615

Otuz Beşinci Madde: Merkez-i livaya merbut olan kazanın bir kaymakamı olup deavisi liva meclislerinde rüyet olunur. Kaymakam hem kazanın umur-ı mülkiyesine memur olacak ve hem de mutasarrıfa umur-ı umumiyede iane edip unvanı mutasarrıf muavini olacaktır. (1)

Otuz Altıncı Madde: Sancakta bulunacak zabtiye fırkasının amiri liva mutasarrıfı olup validen alacağı emre göre bunları kazalara taksim ve ikame eyleyeceği misillü ledü’l-hace bir kazadan diğer kazaya asakir-i zabtiyenin sevk ve ikamesine muktedir olacağıdır. Sancakta bulunan kuvve-i zabtiyenin el-büyük zabiti liva zabtiyesinin amiri olup zabtiye nizamnamesine tevfikan liva mutasarrıfının emri altında olarak hareket edecektir.

(Fasl-ı Sani)

(İdare-i Livanın Umur-ı Hukukiyesi)

Otuz Yedinci Madde: Her livada bir hakim olup nizami ve kanuni rüyet olunan deaviden gayri mahkeme-i şer’iyeye ait olan davaların fasl ve hükmüne memurdur. Hakim-i liva makam-ı celil-i fetvanın intihabı üzerine nasb ve tayin olunur.

Otuz Sekizinci Madde: Re’s-i livada bir meclis-i temyiz olup bu meclis nizamen kaza deavi meclislerinin rüyet edemeyeceği veyahut kaza deavi meclislerinde ba’de’r-rüyet ashabının istinaf edecekleri cinayet ve hukuk davalarını rüyet edecektir. (2)

Otuz Dokuzuncu Madde: Re’s-i sancağın meclis-i temyizi hakiminin riyaseti altında olarak suret-i intihapları beşinci babda beyan olunacak olan mümeyyiz namıyla üçü müslim ve üçü gayr-i müslim altı azadan mürekkep olacaktır. Ve işbu mecliste umur-ı hukukiye ve kanuniyeye vakıf taraf-ı devletten mensup bir memur-ı mahsus bulunacaktır.

Kırkıncı Madde: İşbu meclis-i temyiz evvelâ ahali-i İslamiyeye ait olup mehakim...

__________________
(1) Merkez-i kaza kaymakamlığı mülğadır.
(2) Mehakim-i nizamiye nizamnamesi meclis-i temyizin vezaifini bazı mertebe tadil etmiştir.