631

( Fasl-ı Hâmis )
( Umûr-ı Ecnebiye Müdürlerinin Vezâifi )

Yirmi İkinci Madde: Umûr-ı ecnebiye müdürünün vezâifi vilâyetin umûr-ı hâriciyesinden dolayı vâlinin re’y ve emri tahtında olarak konsoloslarla muhâbere ve mükâlemeden ve kendisine havâle olunan mesâlih-i ecnebiye hakkında ahkâm-ı ahdiye ve kavâid-i düveliyeye müteallik mülâhazâtı ve mütâlaât-ı mahsûsasını şifâhen ve tahrîren vâliye tebliğ ve ihtâr etmekden ibâretdir.

( Fasl-ı Sâdis )
( Zirâat ve Ticâret Müdürlerinin Vezâifi )

Yirmi Üçüncü Madde: Zirâat ve ticâret müdürünün vazîfesi evvelâ dâhil-i vilâyetde her mahallin mevki-i coğrafîsi ve kâbiliyet-i tabîiyesi îcâbınca mevâdd-ı zirâiyece fennen ve amelen iktizâ edecek tanzîmâtı sâniyen vilâyetin terakkî-i ticâret-i umûmiyesine âid kâffe-i tedâbîri tedkîk ve keşf ve ta‘yîn ile tahrîren vâliye tebliğden sâlisen idhâlât ve ihrâcât ve mevâdd-ı zirâat-i vilâyete müteallik tedkîkât ve ma‘lûmâtın zabt ve cem‘ ve tedvîninden râbian terakkî-i ticâret ve zirâat hakkında olan icrââta nezâretden ibâretdir.

Yirmi Dördüncü Madde: Zirâat ve ticâret müdürü yirmi üçüncü maddede münderic ahvâl hakkında vukûbulacak icrââtın her sene nihâyetinde bir fezlekesini yapıp Bâb-ı Âlî’ye takdîm olunmak üzere vâli-i vilâyete i‘tâ eyler.

( Fasl-ı Sâbi‘ )
( Maârif Müdürlerinin Vezâifi )

Yirmi Beşinci Madde: Maârif müdürünün vezâifi vilâyet meclis-i maârifine riyâset etmek ve vilâyetin maârife müteallik mesâlih-i câriyesine ve ıslâhât-ı mukarrerenin icrâât-ı fi‘liyesine ve maârif nizâmnâmesi ahkâmının ve maârif nezâretinden alınacak ta‘lîmâtın tamâmî-i icrâsına ve merkez-i vilâyetde bulunan mekteb ve kütübhânelerin ve alel-husûs idâdiye ve mekâtib-i sultâniye ve âliyenin teftîşine ve vilâyet maârifi tahsîsâtının karâr ve nizâmı dâiresinde sarf ve isti‘mâline nezâret ve dikkat