635

Otuz sekizinci madde: Liva tahrirat müdürünün vazifesi livanın kâffe-i mekatibatının idaresi ve kuyudunun cem‘ ve muhafazası maddesi olup umur-ı tahririyeyi maiyetinde bulunan tahrirat kalemi ve umur-ı kuyudiyeyi kalem-i mezkûr heyetinden müntehab memur-ı mahsus vasıtasıyla idare eder.

Otuz dokuzuncu madde: Liva defter-i hakani memurininin vazifesi yirmi dokuzuncu maddenin idare-i livaya taalluk eden kısmının icraatı olup idarenin umur-ı müteferriasını vilayet defter-i hakani müdürünün vali vasıtasıyla mutasarrıfa tebliğ edeceği tarifnamelere tevfik eder.

Kırkıncı madde: Liva emlak ve nüfus memuriyetleri dahi nüfus ve emlak idare-i umumiyesine dair otuz birinci maddede muharrer vezaifin idare-i livada icraatı ve merkez-i livaya merbut olan kazanın mürur tezkireleri ve pasaportlar muamelatının usul-ı umumiyesine tevfikan doğrudan doğruya idaresidir ve vezaif-i esasiyenin enva ve derecatı nizamat-ı mahsusaya tabidir.

Kırk birinci madde: Liva heyet-i zabtiyesinin mesuliyet-i umumiyesi livada bulunan en büyük zabtiye zabitine muhavveldir.

Kırk ikinci madde: Liva heyet-i zabtiyesi amirinin vezaifi zabtiye nizamnamesine ve talimat-ı mahsusasına tabidir.

( Fasl-ı Sani )
( Kaza İdaresi Beyanındadır )

Kırk üçüncü madde: Kaza kaymakamları umur-ı mülkiye ve maliye ve zabtiyenin idaresine ve ilamatın mezuniyet-i nizamiye dairesinde icraatına memur olup otuz beşinci ve otuz altıncı maddelerde mutasarrıflar hakkında muayyen olan vezaifin idare-i kazaya taalluk eden kısmı kaymakamlara aittir.

Kırk dördüncü madde: Nevahi müdürlerinin fasl-ı mahsusunda beyan olunan kaideye tevfikan intihabı ve mecalis-i nevahinin mutasarrıf-ı livadan bi’l-istizan evkat-ı muayyenede celb ve cem‘ine ruhsat itası ve mecalis-i mezkûre kararlarından kendisine ihbar ve ifade olunan mevadın meclis-i idare-i kazada ba‘de’l-müzakere ve inde’l-icab merkez-i livadan istizan ile icrası ve nevahi dairelerinin teftişi dahi kaymakamların cümle-i vezaifindendir.