655

İcab iden mikdar sermayeyi saltanat-ı seniye tahsis buyurması ve bu sermayenin suret-i sarfı meclis-i umuminin nezareti altında cereyan eylemesi. Salis aşer: Memalik-i devlet-i aliyenin eyalat-ı sairesinin hükümete te’diye eyledikleri vergiden Girit ahalisi min-el-kadim muaf olduklarından cezire ahalisinden yalnız aşar ve müskirat ve gümrük rusumatıyla ihracat ve sarfiyat-ı dahiliye gümrüğünün tenzili mukabilinde ihdas olunmuş olan tuz ve tütün rusumundan ve min-el-kadim sair memalikle beraber cezire ahalisi taraflarından te’diye olunmakda olup fakat bu kere ıslahatı icra olunmakda olan rusumat-ı muayyeneden başka bir şey alınmaması. Rabi’ aşer: Varidat-ı devletin tamamı muhafazasıyla emr-i tahsilinde ahalice menfaat ve suhuleti mucib olacak ıslahat ve ta’dilatın müzakeresine meclis-i umumi memur edilerek vereceği re’y ve mütalaa üzerine iktizasına teşebbüs olunması karargir olmuş olduğundan bu esaslara tatbikan mehakim ve idare-i umur-ı mülkiye ve maliyeye dair bu kere irade-i seniye-i mülukanemizle ayrı ayrı tanzim olunan kavanindir ki ber-vech-i ati ibareleri zikr ve beyan olunur.

( Kısım-ı Evvel )
( Kazalarda bulunan muhtelit deavi meclislerinin )
( Suret-i teşekkülüne dairdir )

Birinci bend: Her bir kazada bir muhtelit deavi meclisi bulunacaktır.......

İkinci bend: Meclis-i mezkur bir reis ile dört a’zadan mürekkeb olacaktır.

Üçüncü bend: Reisin intihab nasb ve azl ve tavzifi doğrudan doğruya devlet canibinden icra olunacaktır.

Dördüncü bend: Kaza muhtelit deavi meclisinin a’zası kaimmakam marifetiyle tanzim olunacak mahsus defterde isimleri münderic olan kimseler içinden intihab olunacaktır.

Beşinci bend: Binaenaleyh yirmi yaşını tekmil etmiş olan ve atide beyan olunacağı vechle müstesna veyahut gayr-i müstahak tutulacak sınıftan olmayan