660

Yirmi üçüncü bend: Meclis-i mezkûr bir reis ile dört a'zâdan mürekkeb olacakdır.

Yirmi dördüncü bend: Reisin intihâb ve nasb ve azl ve tavzîfi doğrudan doğruya devlet tarafından icrâ olunacakdır.

Yirmi beşinci bend: Vilâyet muhtelit deâvî meclisinde a'zâ bulunacak olan zevât intihâb usûlü üzere ta'yîn olunacakdır.

Yirmi altıncı bend: Beher sene ibtidâsında cezîrenin her bir kazâsından ikişer İslâm ve ikişer Hristiyan merkez-i vilâyete i'zâm olunarak bunlardan bir cem'iyyet akdiyle müddet-i me'mûriyeti hitâm bulmuş olan Hristiyan veyâhud İslâm a'zânın yerine ekseriyyet-i ârâ ile yine bir İslâm veyâhud Hristiyan ta'yînine me'mûr olacaklardır. Ve vilâyet muhtelit deâvî meclisi a'zâsının müddet-i me'mûriyetleri dört sene olacak olduğundan işbu nizâmnâmenin icrâsına mübâşeret olunduğundan i'tibâren birinci sene hitâmında kur'a keşîdesiyle dört a'zâdan hangisinin meclisden çekilecek olduğu ta'yîn edeceğinden birinci sene çıkan Hristiyan ise sene-i âtiye hitâmında çıkacak olan iki a'zâ-yı İslâmiye'den birisi olacakdır ve bu sûretde beher sene bi'l-münâvebe bir Hristiyan veyâhud İslâmın intihâbına mübâderet olunarak ikinci sene hitâmında çıkacak olan Hristiyan veyâhud İslâmın ta'yîn olundukdan sonra artık sene-i âtiyede kur'a keşîdesine hâcet kalmayacakdır.

Yirmi yedinci bend: Usûl-i intihâbiyenin icrâsı husûsunu mübeyyin mazbata vâli-yi vilâyet tarafından temhîr olunarak bir nüsha-i musaddakası kuyûdda hıfz olunmak üzere vilâyet deâvî meclisi reisine tevdî' olunacakdır.

Yirmi sekizinci bend: Vilâyet muhtelit deâvî meclisi a'zâsına me'mûr bulundukları müddet içün dokuz bin guruş ma'âş-ı senevî tahsîs olunacakdır.

Yirmi dokuzuncu bend: Vilâyet muhtelit deâvî meclis reisi tarafından meclis günleri ve küşâd ve hitâm sâ'atleri bâ-i'lânnâme ta'yîn ve beyân olunacakdır.

Otuzuncu