665

( Kısım-ı Sâmin )
( Kaza ve Mutasarrıflık ve Vilayet Muhtelit Deavi Meclislerinin )
( Cümlesine aid olacak mevad-ı nizamiye )

Kırk birinci bend
Müddet-i memuriyetleri hitamında infisalleri lazım gelen meclis azası gerek bulundukları meclisin ve gerek diğer bir meclisin azalığına tekrar intihab olunabileceklerdir.

Kırk ikinci bend
Her bir deavi meclisinde lüzumu kadar kâtib ve mübaşirler bulunacak ve bunlar suret-i tayinlerini mübeyyin mahsus nizamname ahkâmı mucibince devlet tarafından nasb ve tavzif olunacaktır.

Kırk üçüncü bend
Girid Ceziresinde Hristiyan ve İslam ahalisinin pek çoğu yalnız Rumca tekellüm edegeldiklerinden muhtelit deavi meclisinin ilamatı Türkçe ve Rumca olarak tahrir ve tanzim olunacaktır.

Kırk dördüncü bend
Balada zikrolunan meclislerde rüyet olunacak mevadda dair takdim olunan istidalar hükümet tarafından meclise havale olunmağa hacet kalmaksızın doğrudan doğruya meclise verilecektir.

Kırk beşinci bend
Hukuk-ı adiyeye dair muhtelit deavi meclislerinin verecekleri ilamatın icrası hükümet-i mahalliyeye aid olup fakat icrası esnasında yine madde-i mahkûmeye müteallik olarak bir nevi niza ve dava zuhur eylediği takdirde işbu dava birinci ilamı vermiş olan muhtelit deavi meclisine aid olacak ve ticaret ve ihtiyar meclislerinin ilamatının icraatında tekevvün edebilecek ihtilafat dahi bunların merbut oldukları sancağın muhtelit deavi meclisinde fasl olunacaktır.

Kırk altıncı bend
Vilayet derununda bulunan bilcümle muhtelit meclislerde rüyet olunacak deaviden ahzı iktiza edecek resmi tayin etmek üzere heman tarife-i mahsusa tanzim kılınacaktır.

Kırk yedinci bend
Muvakkaten icrası kanunen mecaz olan ilamatdan maada istinaf arzuhali takdim olundukça ilamın icrası tevik olunacak ise de işbu tevik maddesi hukuk-ı adiyece veyahud cezaiyece meclis canibinden tensib veyahud sahib-i dava tarafından taleb olunacak tedabir-i ihtiyatiyenin ittihazına mani olmayacaktır.

84