669

( Kısım-ı Sâni-i Aşer )

( İhtiyar meclislerinin vazife-i memuriyetlerine dâirdir )

Altmış sekizinci bend: Köylerde bulunacak olan ihtiyar meclisleri her gûne ve sulhan tesviye olunabilecek deâvînin rü’yetine me’mûr olup tarafından tahrîren kabûl olunmamış veyâhûd kabûl olunacağına dâir kompromisyon verilmemiş olduğu hâlde ihtiyar meclislerinin verecekleri kararların bir hükmü olmayacak ve her vakit köy ihtiyar meclislerinin verecekleri kararları fiile getirilmesi zımnında ihtiyar meclislerinin dâhil-i dâire-i hükmü bulunduğu muhtelit deâvî meclisi tarafından işbu kararın tasdik ettirilmesi lâzımeden olacaktır.

Altmış dokuzuncu bend: Makarr-ı mutasarrıflıkda bulunacak Hristiyan ihtiyar meclisi mücerred Hristiyanlar içün bend-i sâbıkda beyân olunan köy ihtiyar meclislerinin vazifeleriyle kezâlik Hristiyanlar vasiyetnâmelerinde bulunan şerâitin tamâmî-i vikâyesine ve Hristiyan olup vasî ve velî tahtında bulunan bilcümle kimesnelerin lâyıkı vech üzere idâre-i emvâline nezâret edecektir.

Yetmişinci bend: Bend-i sâbıkın âhirinde beyân olunan vezâif ve hukûk-ı İslâmiye içün mutasarrıflık İslâm dimogerondiasına âid olacaktır.

Yetmiş birinci bend: Mutasarrıflık Hristiyan dimogerondiaları tarafından dâire-i vazife-i muayyeneleri dâhilinde olduğu cihetle rü’yet olunup aslen beş bin kuruş mikdârını tecâvüz eden veyâhûd akçece mikdârı ta’yîn olunamayan da’vânın istînâfen sûret-i kat’iyyede hükm ve faslı Dersaâdet Rûm Patrikliği mahkemesine âid olacak ve mezkûr dimogerondialar hâkim sıfatında olmayarak mücerred kendilerine ber-vech-i bâlâ mufavvaz olan emvâl-i eytâm maddesince bulunacak oldukları icrâatça vilâyet meclis-i idâresinin taht-ı nezâretinde bulunacaklardır.

( Kısım-ı Sâlis-i Aşer )

**( İki veyâhûd müteaddid meclis ve mahkeme beyninde bir da’vâya dâir salâhiyetleri )
( olup olmadığı mes’elesinden dolayı zuhûru melhûz olan ihtilâfın )
( sûret-i izâle ve tesviyesine dâirdir )**

Yetmiş ikinci bend: İki meclis veyâhûd iki mahkeme bir da’vânın rü’yeti zımnında