677

Bir maslahatın müzakeresinde müsavat-ı efkâr husulüyle ekseriyet bulunamadığı takdirde valinin riyaset sıfatıyla o işde re'yi iki itibar olunacaktır.

Yirmi sekizinci bend: Meclis-i mezkûrun ekall nısf azası hazır bi'l-meclis olmadıkça idareye aid mesalih-i hukukiye rüyetine mübaderet olunamayacak ve verilecek kararın hükmü olmayacaktır.

Yirmi dokuzuncu bend: Girit nizamname-i cedidi hükmünce vilayetin umur-ı tahririyesi iki lisan üzere cereyan eyleyeceğinden idare meclislerinden yapılacak mazbatalar hem Türkçe ve hem de Rumca olarak yapılacakdır.

Otuzuncu bend: Vilayet idare meclisinin aza-yı muvakkatesi meclis-i umumi aza-yı müslim ve hristiyaniyesi tarafından birlikte re'y verilerek muhtelit deavi meclisleri azası intihabı zımnında tanzim olunacak defterde isimleri münderic olan kimesneler içinden intihab olunacak ve müddet-i memuriyetleri üç seneden ibaret olacaktır.

Otuz birinci bend: Balada beyan olunduğu vechle birinci sene hitamında kur'a keşidesiyle ibtida intihab olunan altı azadan infisalleri lazım gelecek bir müslim ve bir hristiyan yerine meclis-i umumi tarafından diğerlerinin intihabına mübaderet olunacak ve ikinci sene hitamında kezalik kur'a keşidesiyle ibtida intihab olunanlardan meclisde kalan dört azadan infisalleri lazım olacak bir müslim ve bir hristiyan yerine meclis-i umumi tarafından diğerlerinin intihab ve tayini icab edecek olduğundan sinin-i atiyede artık kur'a keşidesine hacet kalmayacaktır.

Otuz ikinci bend: Balada beyan olunduğu vechle meclis-i umumi vilayet idare meclisine bir aza intihab etdiği zaman li-sebebin mine'l-esbab bu azanın meclise devam edememek halinde bulunduğu vakit azalığı müddetinin inkizasına değin yerine kaimmakam olmak için bir mülazım tayin edecektir.

Otuz üçüncü bend: İdare meclisinin ber-vech-i muharrer ahali tarafından intihab olunacak altı nefer azasının senevi dokuzar bin kuruş maaşları olacaktır.