679

Otuz Sekizinci Bend
Bilakis vilayet idare meclisinin re'yi munzam olarak veyahut olmayarak vali canibinden mutasarrıfa emrolunan veyahut mutasarrıfın re'sen ittihaz eylediği icraatın livaca infazı hususu tezekkür ve tahkike muhtaç olduğu takdirde mutasarrıfın liva idare meclisine müracaat eylemesi lazimeden olmağla on üçüncü bendden yirmi birinciye kadar olan bendlerde gösterilen mevadda vali ile vilayet idare meclisinin tayin ve tahdid-i vezaifi zımnında ittihaz olunan kaideler mutasarrıf ile liva idare meclisinin tayin ve tahdid-i vezaifi zımnında dahi mer'iyyü'l-icra tutulacaktır. Ve kaymakamlar doğrudan doğruya mutasarrıflara merbut oldukları misillü kaza idare meclisleri dahi liva idare meclislerine merbut olacağından kaza kaymakamı ve idare meclisleri ile mutasarrıf ve liva idare meclisi beyninde vuku bulacak muamelatda liva mutasarrıfı ve liva idare meclisi ile vali ve vilayet idare meclisi beyninde cari olan kaide aynen cereyan edecektir.

Otuz Dokuzuncu Bend
Kuvve-i icraiye ve hakk-ı müsabakat mutasarrıf ve kaymakamlara aid olduğundan liva ve kaza idare meclisleri vezaifleri iktizasından olarak verdikleri re'yin icrasından mesul olmayacaklardır.

Kırkıncı Bend
Umur-ı maliyede elviye mutasarrıflarıyle muhasebecilerin ve kaza kaymakamlarıyle mal müdürlerinin ve merkez-i vilayet ve liva ve kazalar idare meclislerinin vezaifi vilayetlerin umur-ı maliye nizamnamesinde tayin olunmuştur.

Kırk Birinci Bend
Yirmi yedi ve yirmi sekiz ve yirmi dokuzuncu bendlerin ahkamı liva ve kaza idare meclisleri haklarında dahi cari olacaktır.

Kırk İkinci Bend
Kaza idare meclislerinin azası muhtelit deavi meclislerinin intihab-ı azası zımnında tanzim olunacak defterde isimleri münderiç olan kimseler içinden birisi bir müddet bila-maaş hizmet etmek üzere her bir kazanın ihtiyar meclisleri tarafından intihab olunacaktır.

Kırk Üçüncü Bend
Her livanın idare meclisi azası ve o liva dahilinde bulunan kazaların idare meclisleri ve muhtelit mahkemeleri marifetiyle ve aza-yı müslimesi...